Карло Анчелотти Неймар масаласида иккиланишда

Бразилия терма жамоаси бош мураббийи Карло Анчелотти 2026-йилги Жаҳон чемпионати учун таркибни шакллантиришда Неймар билан боғлиқ мураккаб қарорга дуч келганини тан олди. Гарчи тажрибали ҳужумчи ўзининг афсонавий мақомига эга бўлса-да, мураббий унинг жисмоний ҳолати ва ўйин амалиётини диққат билан таҳлил қилмоқда. Бу ҳақда Goal.com хабар беради.

Неймар 55 нафар футболчидан иборат дастлабки рўйхатга киритилган, бироқ 18-май куни эълон қилинадиган якуний 26 кишилик таркибда унинг ўрни кафолатланмаган. "Ал Ҳилал"даги муваффақиятсиз давр ва жароҳатлардан сўнг "Сантос"га қайтган футболчи ўзининг аввалги даражасига қайтишга уринмоқда.

Анчелоттининг сўзларига кўра, қарор қабул қилишда нафақат индивидуал маҳорат, балки жамоадаги муҳит ҳам муҳим аҳамият касб этади. Мураббий Неймар жамоа ичида жуда ҳурматли эканлигини ва жамоадошлари уни таркибда кўришни исташини таъкидлаб ўтди.

Шунга қарамай, италиялик мутахассис якуний қарор фақат ўзига боғлиқлигини ва ташқи босим унинг ишига таъсир қилмаслигини билдирди. У жамоа ичидаги соғлом муҳит ҳар қандай ҳолатда ҳам сақланиб қолишига ишонч билдирмоқда.