MLS мунтазам чемпионатининг навбатдаги турида мухлислар ҳақиқий голлар шоусига гувоҳ бўлишди. 13-тур доирасида «Цинциннати» ўз майдонида «Интер Майами»ни қабул қилди. Саккизта гол урилган ушбу учрашувда меҳмонлар 5:3 ҳисобида иродали ғалабага эришди.
Беллашувнинг бош қаҳрамони, шубҳасиз, Лионель Месси бўлди. Аргентиналик юлдуз майдонда тўлиқ ҳаракат қилди ва 3 та гол ҳамда 1 та голли узатма билан учрашув тақдирига ҳал қилувчи таъсир кўрсатди. Бу ўйин яна бир бор Месси катта саҳнада ҳали ҳам рақамлар, ҳиссиёт ва натижа ярата олишини исботлади.
Ҳисоб 24-дақиқада Месси томонидан очилди. Аммо «Цинциннати» тезда ўйинга қайтишга муваффақ бўлди. 41-дақиқада Денкей пенальтидан ҳисобни тенглаштирди. Иккинчи бўлим бошида Буча мезбонларни олдинга олиб чиқди, 55-дақиқада Месси яна бир бор жавоб қайтарди. 64-дақиқада Эвандер гол уриб, «Цинциннати»ни 3:2 ҳисобида олдинга чиқарди.
79-дақиқагача «Интер Майами» ҳисобда ортда бораётганди. Аммо шундан кейин меҳмонлар ҳақиқий камбэкни амалга оширишди. 79-дақиқада Силветти ҳисобни тенглаштирди, 84-дақиқада Бертераме «Интер Майами»ни олдинга олиб чиқди. 89-дақиқада эса Месси ўзининг учинчи голини урди ва ҳет-трикни расмийлаштириб, ўйинга нуқта қўйди.
Бу ғалаба «Интер Майами» учун турнир жадвалидаги ҳолатини яхшилаш нуқтаи назаридан ҳам жуда муҳим бўлди. Жамоа 25 очко билан умумий жадвалда 4-ўринда бормоқда. «Цинциннати» эса 16 очко жамғарган ҳолда 19-поғонада қайд этилган.
MLS, 14 май
«Цинциннати» — «Интер Майами» 3:5
Голлар: Денкей, 41 пенальти; Буча, 49; Эвандер, 64 — Месси, 24, 55, 89; Силветти, 79; Бертераме, 84.
«Интер Майами» таркиби: Сент-Клейр, Фрэй, Лужан, Микаэл, Регилон, Мура 65, Брайт, де Паул, Сеговия, Месси, Суарес, Силветти 77, Бертераме.
Қисқаси, «Интер Майами» қийин вазиятдан чиқиб, муҳим ғалабани илиб кетди. Месси эса яна бир бор ўйинни ўз қўлига оладиган даражадаги футболчи эканини кўрсатди. 79-дақиқагача мағлубият, якунда эса 5:3 ҳисобида ғалаба — бу футбол, бу Месси, бу ҳали шоу тугамаганини англатади.
[media=youtube]OvweCJQEDYg[/media] “Zamin”ни Telegram'да ўқинг!
