Арне Слот ўзининг сўнгги баёнотларига кўра, ёзги мавсумдан кейин ҳам Ливерпул бош мураббийи лавозимида қолиши кутилмоқда. Жамоанинг мавсумдаги нобарқарор ўйинлари ва Англия Премер-лигаси якунланишига икки тур қолганида кучли тўртликдаги ўрнини ҳали кафолатламаганига қарамай, нидерландиялик мутахассис Энфилдда қолишига ишора қилмоқда. Бу ҳақда Goal.com хабар беради.
Матбуот анжуманида 47 ёшли мураббий ўз позициясида қатъий эканлигини таъкидлади. У Астон Вилла билан бўладиган муҳим баҳс олдидан: "Келаси мавсумда ҳам Ливерпул мураббийи бўлиб қолишимга ишонишим учун барча асосларим бор", – дея баёнот берди. Шунингдек, у трансфер бозорида фаол бўлиш режаларини тасдиқлаб, клуб раҳбарияти билан янги футболчилар бўйича музокаралар олиб борилаётганини қўшимча қилди.
Мавсум давомида Хаби Алонсо билан боғлиқ миш-мишлар ва мухлисларнинг норозилиги Слотнинг истеъфоси ҳақидаги гап-сўзларни кучайтирган эди. Айниқса, Рио Нгумоҳа ўрнига Алехандер Исакнинг майдонга туширилиши мухлислар томонидан салбий кутиб олинди. Шунга қарамай, мураббий жамоани Чемпионлар лигаси йўлланмаси сари етакламоқда.
Ливерпул жорий мавсумда стандарт вазиятлардан гол ўтказиб юбориш бўйича антирекорд ўрнатди. Энзо Фернандезнинг жарима зарбасидан киритган голи жамоанинг жорий мавсумда стандартлардан ўтказиб юборган 18-голи бўлди, бу эса Англия Премер-лигаси тарихидаги клуб учун энг ёмон кўрсаткич ҳисобланади.
“Zamin”ни Telegram'да ўқинг!
