Хаби Алонсо ижтимоий тармоқлардаги постлари орқали Челси жамоасини бошқаришга яқин турганини тасдиқлади. Испаниялик мутахассис Лиам Росениор истеъфога чиқарилганидан сўнг, Стамфорд Бридгеда доимий бош мураббий сифатида иш бошлаши кутилмоқда. Бу ҳақда Goal.com хабар беради.
Алонсо ўзининг Х саҳифасида Marca нашрининг ўзининг Лондон клубига ўтиши ҳақидаги хабарини улашди. Гарчи пост кейинчалик ўчириб ташланган бўлса-да, бу ҳолат томонлар ўртасида тўрт йиллик шартнома бўйича келишувга эришилганини англатади. Мутахассис ўтган ҳафта Лондонда клуб раҳбарияти билан юзма-юз музокаралар ўтказган.
Баер Леверкусен билан Германияда тарихий натижаларга эришган ва Бундеслигада мағлубиятсиз чемпион бўлган Алонсо, эндиликда Челсининг инқирозли даврини якунлаш вазифасини ўз зиммасига олади. У январ ойида Реал Мадриддаги фаолиятини якунлаганидан бери ишсиз эди.
Айни дамда Челси вақтинчалик мураббий Калум МкФарлане қўл остида мавсумни якунлади. Жамоа Англия кубоги финалида Манчестер Ситига 0:1 ҳисобида мағлуб бўлди, бу эса клуб раҳбариятини янги ва тажрибали мураббий тайинлаш қарорини тезлаштирди.
“Zamin”ни Telegram'да ўқинг!
