“Манчестер Сити” Англия кубоги финалида “Челси”ни 1:0 ҳисобида мағлуб этиб, клуб тарихида саккизинчи бор ушбу нуфузли соврин соҳиби бўлди. Лондоннинг машҳур “Уэмбли” аренасида ўтган ҳал қилувчи баҳс “шаҳарликлар” учун яна бир тарихий кечага айланди.
Финалдаги ягона гол “Манчестер Сити”га кубок тақдим этган бўлса, учрашувдан кейинги энг катта муҳокама Абдуқодир Ҳусанов ва “Челси” ҳужумчиси Жоао Педро иштирокидаги баҳсли вазият атрофида бўлмоқда.
Биринчи бўлимда Жоао Педро “Сити” жарима майдонига хавфли тарзда ёриб киришга уринди. Шу пайт Абдуқодир Ҳусанов рақиб билан елкама-елка тўқнашди. Бразилиялик футболчи ерга қулаб тушди ва “Челси” футболчилари дарҳол бош ҳакамдан пенальти талаб қила бошлади.
Бироқ учрашув бош ҳаками Даррен Инглэнд бу эпизодда қоидабузарлик кўрмади. У ўйинни давом эттирди ва ҳатто ВАР ёрдамига ҳам мурожаат қилмади. Айнан шу қарор финалдан кейин футбол жамоатчилигида қизғин баҳсларга сабаб бўлди.
Айрим мухлислар Ҳусановнинг ҳаракатини қонуний жисмоний кураш деб баҳоламоқда. Уларга кўра, ўзбекистонлик ҳимоячи рақибга имкон бермаган, аммо қоида доирасидан чиқмаган. “Челси” тарафдорлари ва бир қатор экспертлар эса бу вазиятда пенальти белгиланиши керак эди, деган фикрда.
Баҳсли эпизод ҳақида афсонавий француз футболчиси Тьерри Анри ҳам ўз муносабатини билдирди. Унинг фикрича, Абдуқодир Ҳусанов Жоао Педрога қарши қоидабузарлик қилган ва бу ҳолат нафақат пенальти, балки қизил карточкага ҳам тортиши мумкин эди.
Анри ўйиндан кейинги эфирда вазиятни қайта кўриб чиққанини ва ҳакам қарорига қўшилмаслигини айтди. Франция терма жамоасининг собиқ ҳужумчиси Ҳусанов бу эпизодда тўп учун ўйнашга жиддий уринмаган, деган фикрни илгари сурди.
“Мен такрорий лавҳани яна бир бор кўрдим ва очиғини айтсам, Ҳусановнинг Жоау Педрога қарши фоли — бу тоза пенальти. Менимча, у ерда ҳатто қизил карточка ҳам бериш керак эди”, — деди Тьерри Анри.
Шу билан бирга, Анри бундай вазиятларда кўплаб экспертлар очиқ фикр билдиришдан эҳтиёт бўлишини ҳам таъкидлади. Унинг фикрича, айрим мутахассислар мухлислар, оммавий ахборот воситалари ёки футбол жамоатчилигининг реакциясидан чўчиб, баҳсли қарорларни кескин танқид қилмасликни маъқул кўради.
Бу эпизод Абдуқодир Ҳусановнинг Англия футболидаги ўйин услубини яна бир бор муҳокама марказига олиб чиқди. 22 ёшли ҳимоячи жисмоний курашдан қочмайди, рақибга қаттиқ босим ўтказади ва жарима майдонида ҳам қатъият билан ҳаракат қилади. Айнан шу жиҳатлари уни “Сити” ҳимоясида муҳим фигурага айлантирмоқда.
Шу билан бирга, Англия футболида бундай ўйин услуби доим баҳслар билан ёнма-ён юради. Бир томонда ҳимоячининг жасорати ва характерини мақтайдиганлар бор. Иккинчи томонда эса у қоидабузарлик чегарасида ўйнамоқда, деб ҳисоблайдиганлар ҳам кам эмас.
Ҳар қандай ҳолатда ҳам, натижа ўзгармайди: “Манчестер Сити” Англия кубогини қўлга киритди, Ҳусанов эса жамоаси билан мавсумдаги иккинчи совринига эга чиқди. Аввалроқ у “шаҳарликлар” билан Англия лига кубогида ҳам зафар қучган эди.
Энг муҳим жиҳатлардан бири шуки, Абдуқодир Ҳусанов Англия футболида соврин қўлга киритган биринчи ўзбек футболчиси сифатида тарихга кирди. У нафақат совринли жамоа аъзоси бўлди, балки ҳар икки финалда ҳам майдонга тушиб, “Манчестер Сити” муваффақиятига ўз ҳиссасини қўшди.
Бу эса ўзбек футболи учун катта воқеа. Англия каби юқори босимли чемпионатда, “Уэмбли” каби саҳнада финал ўйнаш ва соврин кўтариш ҳар қандай футболчи учун улкан ютуқ ҳисобланади.
Қисқаси, Ҳусанов финалда яна диққат марказида бўлди. Кимдир уни қатъиятли ҳимоячи деб мақтамоқда, кимдир эса пенальтидан қутулиб қолди, демоқда. Аммо бир нарса аниқ: Абдуқодир Англия футболига шунчаки келмади — у ерда ўз номи атрофида катта баҳслар бошлатиш даражасига чиқди.
“Zamin”ни Telegram'да ўқинг!
