Реал Мадриддаги муваффақиятсиз мавсумдан сўнг, Хаби Алонсо кутилмаганда Челси жамоасини бошқарадиган бўлди. Кўпчилик мутахассислар испаниялик мураббийнинг бу қарорини таваккалчилик деб атамоқда, чунки Лондон клуби сўнгги йилларда доимий тартибсизликлар ва мураббийлар алмашинуви гирдобида қолиб кетган. Бу ҳақда Goal.com хабар беради.
Челси раҳбарияти Алонсо билан 2030-йилга қадар мўлжалланган тўрт йиллик шартнома имзолади. Қизиғи шундаки, клуб уни оддий "бош мураббий" эмас, балки "менежер" сифатида таништирди. Бу мақом Алонсога таркибни шакллантириш ва трансфер сиёсатида кенгроқ ваколатлар берилишини англатади, бу эса клубда узоқ муддатли лойиҳа бошланаётганидан далолат беради.
Эслатиб ўтамиз, аввалги мураббийлар Энзо Мареска ва Лиам Росениор клубда узоқ қола олишмади. Айниқса, Росениорнинг атиги уч ярим ой ичида истеъфога чиқарилиши жамоа ичидаги муҳит қанчалик оғир эканини кўрсатди. Футболчилар билан тил топиша олмаслик ва кийиниш хонасидаги низолар унинг фаолиятига нуқта қўйди.
Алонсо учун ҳам худди шундай хавф мавжуд. Реал Мадриддаги қисқа муддатли фаолияти давомида у Винисиус Жуниор ва Жуд Беллингем каби юлдузлар билан келишмовчиликларга боргани сир эмас. Испаниялик мутахассис энди Челси юлдузларини жиловлаб, жамоани янги чўққиларга олиб чиқа оладими ёки йўқ, буни вақт кўрсатади.
“Zamin”ни Telegram'да ўқинг!
