"Арсенал"нинг афсонавий футболчиси Рей Парлор Микел Артетанинг клубдаги келажаги борасида ўз фикрлари билан ўртоқлашди. Унинг сўзларига кўра, испаниялик мураббий Арсен Венгер каби узоқ йиллар давомида "канонирлар"ни бошқариш салоҳиятига эга. Бу ҳақда Goal.com хабар беради.
Ҳозирги кунда "Арсенал" Англия Премер-лигаси ва Чемпионлар лигасида ғолиблик учун кураш олиб бормоқда. Артетанинг амалдаги шартномаси 2027-йилнинг ёзига қадар мўлжалланган. У 2019-йил декабридан буён жамоани бошқариб, 350 та ўйинда 211 та ғалабага эришди ва 60 фоизлик натижа қайд этди.
Арсен Венгер 22 йил давомида 1235 та ўйинда жамоани бошқарган бўлса-да, Артетанинг ғалаба фоизи ҳозирча юқорироқ. Агар "Арсенал" жорий мавсумда PSJ устидан ғалаба қозониб, Чемпионлар лигаси бош совринини қўлга киритса, бу Артетанинг клубдаги мавқеини янада мустаҳкамлайди.
Рей Парлорнинг таъкидлашича, жамоа таркиби ёш ва иқтидорли футболчилардан иборат. Унинг фикрича, йирик совринларни ютиш футболчиларга ўз кучига бўлган ишончни қайтаради ва Артетанинг "Эмирейтс" стадионидаги фаолиятини узоқ йилларга чўзишига замин яратади.
“Zamin”ни Telegram'да ўқинг!
