Лионель Месси Интер Миами мухлислари норозилигига муносабат билдирди
MLS доирасидаги Портланд Тимберсга қарши баҳсда Интер Миами ашаддий мухлислари жамоа футболчиларининг ўйиндан сўнг кийим алмаштириш хонасига кириб кетишини ҳурмацизлик деб баҳолаб, 85-дақиқагача сукут сақлашди. Ла Фамилиа гуруҳи аъзолари трибунадан туриб футболчиларни ўз халқига ҳурмат кўрсатишга чақирганида, Лионель Месси трибунага қараб норози ишора қилди ва бу тарангликни кучайтирди.
MLS доирасидаги Портланд Тимберсга қарши ўйинда Интер Миами мухлислари ўзига хос норозилик намойишини ўтказишди. Жамоанинг ашаддий мухлислар гуруҳи бўлган Ла Фамилиа ўйиннинг 85-дақиқасигача стадионда сукут сақлаб, ўз норозилигини билдирди. Улар футболчиларнинг ўйиндан сўнг трибунага яқинлашмай, тўғридан-тўғри кийим алмаштириш хонасига кириб кетишларини ҳурматсизлик деб баҳолашди. Бу ҳақда Goal.com хабар беради.
Мухлислар трибунадан туриб испан тилида футболчиларни ўз халқига ҳурмат кўрсатишга ва уларни тан олишга чақиришди. Ушбу вазиятда Лионель Месси трибунага қараб норози ишора қилди, бу эса мухлислар ва жамоа ўртасидаги тарангликни янада кучайтирди. Ўйин 2:0 ҳисобида Интер Миами фойдасига якунланган бўлса-да, бу ғалаба юзага келган келишмовчилик соясида қолди.
Учрашувдан сўнг жамоа вакиллари вазиятга турлича муносабат билдиришди. Гол муаллифларидан бири Герман Бертераме мухлисларнинг ҳақлигини тан олиб, уларнинг қўллаб-қувватлаши муҳимлигини таъкидлади. Ҳимоячи Факундо Мура эса жамоа ичида бирлик борлигини ва мухлисларни қадрлашларини айтиб, вазиятни юмшатишга ҳаракат қилди.
Вақтинчалик бош мураббий Гуиллермо Ҳоёс эса ушбу можаро юзасидан аниқ фикр билдиришдан ўзини тийди. Интер Миами раҳбарияти ва футболчилари келгусида мухлислар билан муносабатларни яхшилаш ва юзага келган тушунмовчиликни бартараф этиш чораларини кўриши кутилмоқда.
Изоҳлар 0
…