“Манчестер Сити” бош мураббийи Хосеп Гвардиола клубни тарк этиши ҳақидаги маълумот оммага олдиндан тарқалиб кетганидан жиддий норози бўлгани айтилмоқда. The Sun нашри маълумотига кўра, испаниялик мутахассис бу хабар айнан мавсумнинг ҳал қилувчи палласида матбуотга чиқиб кетганидан қаттиқ ранжиган.
Манбага кўра, 55 ёшли мураббий мавсум якунида “шаҳарликлар” билан хайрлашишини футболчиларга шахсан маълум қилган. У якшанба оқшомида жамоа аъзолари билан гуруҳ қўнғироғи ташкил қилиб, клубдан кетиш қарори ҳақида очиқ гапирган.
Айтилишича, Гвардиола бу қарорнинг “Борнмут”га қарши муҳим учрашув арафасида оммага сизиб чиқишини истамаган. Чунки “Манчестер Сити” ҳали чемпионлик учун курашни давом эттираётган бир пайтда бундай хабар жамоа муҳитига таъсир қилиши мумкин.
“Пеп бу маълумот айнан ҳозир ошкор бўлганидан ғазабда. У футболчилар билан боғланиб, кетаётганини тасдиқлади. Шунингдек, у янгиликларнинг бундай тарзда тарқалганидан узр сўради. Бу ҳолат унинг ўзи учун ҳам кутилмаган бўлган. Шанба куни футболчиларга Пеп қолиши айтилганди, шу сабаб ҳамма шок ҳолатида”, — дейди манба.
Гвардиоланинг эҳтимолий кетиши “Манчестер Сити” учун оддий мураббий алмашинуви эмас. Испаниялик мутахассис 2016 йилдан бери клубни бошқариб, жамоани Англия ва Европа футболидаги энг кучли тизимлардан бирига айлантирди.
Унинг қўл остида “Сити” тўп назорати, прессинг, ҳужумкор футбол ва барқарор натижа борасида янги даражага чиқди. Шу сабаб Пепнинг кетиши ҳақидаги ҳар қандай хабар клуб мухлислари ва футболчилар учун катта эмоционал зарба бўлиши табиий.
Аввалроқ Гвардиола “Астон Вилла”га қарши ўйиндан кейин “Манчестер Сити”ни тарк этиши мумкинлиги ҳақида маълумотлар тарқалганди. Энди эса вазият янада жиддий тус олган кўринади.
Қисқаси, Гвардиола кетиш қарори ҳақидаги хабарнинг вақтидан олдин тарқалганидан хафа. “Сити” учун бу катта даврнинг эҳтимолий якуни, футболчилар учун эса шок хабар. Энди энг муҳими — жамоа бу шовқинни четга суриб, мавсумни максимал натижа билан якунлай оладими?
“Zamin”ни Telegram'да ўқинг!
