“Манчестер Сити” ҳужумчиси Эрлинг Ҳоланд мавсумнинг ҳал қилувчи палласида йўқотилган очколардан кейин ўз ҳиссиётларини яширмади. Норвегиялик форвард жамоа бу ҳолатдан тўғри хулоса чиқариши ва кейинги мавсумда Англия Премьер-лигаси чемпионлигини қайтариш учун бор кучини ишга солиши кераклигини таъкидлади.
37-турда “Манчестер Сити” сафарда “Борнмут” билан 1:1 ҳисобида дуранг ўйнади. “Шаҳарликлар” учун бу натижа жуда оғир бўлди, чунки айнан шу очко йўқотиш “Арсенал”нинг муддатидан аввал чемпионликни расмийлаштиришига йўл очди.
Ҳоланд ушбу ўйинда жамоасини мағлубиятдан қутқариб қолди. У 90+5-дақиқада гол уриб, ҳисобни тенглаштирди. Аммо бу гол “Сити”нинг чемпионлик имкониятини сақлаб қолиш учун етарли бўлмади.
“Охир-оқибат Премьер-лигадаги ҳар бир ўйин қийин эканлигини билдик. Биз ҳаракат қилдик, аммо бу етарли бўлмади. Энди бутун клуб бундан мотивация сифатида фойдаланиши керак. Биз жаҳлимиз чиқиши, ичимизда олов ёниши керак, чунки бу етарли эмас”, — деди Ҳоланд клуб матбуот хизматига.
Норвегиялик ҳужумчининг сўзларидан кўриниб турибдики, “Манчестер Сити” бу мавсумдаги иккинчи ўринни оддий натижа сифатида қабул қилмоқчи эмас. Ҳоланд жамоа ичида ғалабага бўлган очлик ва алам янада кучайиши кераклигини айтмоқда.
“Икки йил ўтди, аммо бу гўёки абадийдек туюлмоқда. Кейинги мавсумда чемпионликни қўлга киритиш учун қўлимиздан келган барча ишни қиламиз”, — дея қўшимча қилди у.
Мавсум якунига бир тур қолганида “Манчестер Сити” 78 очко билан иккинчи ўринда бормоқда. “Арсенал” эса 82 очко жамғариб, Англия чемпионлигини муддатидан олдин қўлга киритди.
Қисқаси, Ҳоланд учун бу мавсум аламли якунланмоқда. Аммо айнан шундай алам баъзан кейинги катта ғалабанинг ёқилғисига айланади. “Сити” чемпионликни бой берди, лекин Ҳоланднинг гапларидан маълум: Манчестерда реванш режими аллақачон ёқилди.
“Zamin”ни Telegram'да ўқинг!
