Тоттенхем бош мураббийи Роберто Де Зерби жамоасининг Англия Премер-лигасида жон сақлаб қолиш учун курашини ўтган мавсумдаги Европа лигаси финалидан ҳам устун қўйди. Италиялик мутахассиснинг фикрича, Эвертон билан бўладиган ҳал қилувчи баҳсда клубнинг шани ва тарихий обрўси тикилган. Бу ҳақда Goal.com хабар беради.
"Якшанба кунги ўйин Тоттенхем учун ҳақиқий финал. Бу ўтган йилги Манчестер Юнайтед билан бўлган баҳсдан ҳам муҳимроқ. Биз совриндан кўра қимматлироқ нарса — ғурур ва клуб қадр-қиммати учун майдонга тушамиз. Кубокни ютиш мумкин, аммо ғурурни сақлаб қолиш энг асосийсидир", — деди Де Зерби.
Шимолий Лондон клуби Челси жамоасига қарши кечган баҳсда 2:1 ҳисобида мағлуб бўлгач, вазият янада мураккаблашди. Энзо Фернандез ва Андрей Сантоснинг голлари "шпорлар"ни қийин аҳволга солиб қўйди. Ричарлисон томонидан урилган жавоб голи ҳам жамоани мағлубиятдан қутқара олмади. Ҳозирда Тоттенхем хавфли зонадаги Вест Хем жамоасидан бор-йўғи икки очко олдинда бормоқда.
Таркиб борасида тўхталар экан, Де Зерби жароҳатидан тикланаётган Жамес Маддисон ҳозирча фақат 20 дақиқа ўйнашга тайёрлигини билдирди. Челси билан ўйинда Миккй ван де Вен ва Марк Кукурелла ўртасидаги баҳсли вазиятда ҳакам Стуарт Аттвелл пеналти белгиламаган бўлса-да, мураббий буни баҳона қилмасликка чақирди.
Эндиликда барча эътибор сўнгги турга қаратилган. Де Зерби сўнгги 45 кунни фақат шу мақсад йўлида ўтказганини ва футболчилар Англия Премер-лигасида қолиш учун бор кучини ишга солишини таъкидлади.
“Zamin”ни Telegram'да ўқинг!
