“Манчестер Сити” бош мураббийи Хосеп Гвардиола “Борнмут”га қарши учрашувдан кейин мухлислар томонидан айтилган чақириқларга муносабат билдирди. Англия Премьер-лигасининг 37-туридан ўрин олган баҳс 1:1 ҳисобида якунланди ва “шаҳарликлар” муддатидан аввал чемпионлик имкониятини йўқотди.
Ўйиндан сўнг трибуналардаги “Манчестер Сити” мухлислари испаниялик мутахассисга қарата “Яна бир йил!” деб қўшиқ куйлашди. Бу чақириқ Пепнинг клубда қолишини истайдиган ишқибозлар сони жуда кўп эканини яна бир бор кўрсатди.
Гвардиола эса мухлисларнинг бундай муносабатини илиқ қабул қилди. У футболни, ўз ишини ва “Манчестер Сити”да фаолият юритишни яхши кўришини таъкидлади.
“Мен футболни яхши кўраман, ишимни яхши кўраман ва бу клубда бўлиш менга ёқади. Ҳозир ҳам шу ердаман ва бундан мамнунман”, — деди мураббий.
Пеп мухлислар меҳри ҳақида гапирар экан, уларга нисбатан ўз муносабатини ҳам очиқ билдирди.
“Мухлисларнинг чақириқларими? Улар мени шунчалик яхши кўришади, мен эса уларни бундан ҳам кўпроқ яхши кўраман”, — дея қўшимча қилди Гвардиола.
Сўнгги кунларда испаниялик мутахассиснинг мавсум якунида “Манчестер Сити”ни тарк этиши мумкинлиги ҳақида турли хабарлар тарқалмоқда. Бироқ Гвардиола ҳозирча клубдан кетишини расман тасдиқлагани йўқ. Унинг айтишича, якуний қарор ҳали қабул қилинмаган.
Эслатиб ўтамиз, Пеп Гвардиоланинг “Манчестер Сити” билан амалдаги шартномаси 2027 йилгача мўлжалланган. У 2016 йилдан бери “шаҳарликлар”ни бошқариб, клуб тарихидаги энг муваффақиятли даврлардан бирини яратди.
Қисқаси, мухлислар Пепдан яна бир йил қолишни сўрамоқда, Гвардиола эса ҳозирча аниқ жавоб бермаяпти. Аммо унинг сўзларидан бир нарса сезилади: Манчестер билан боғлиқ ҳиссиёт ҳали совигани йўқ. Энди ҳаммани битта савол қизиқтирмоқда — Пеп кетадими ёки “яна бир йил” деган қўшиқ иш берадими?
“Zamin”ни Telegram'да ўқинг!
