Англия миллий жамоаси ва “Манчестер Юнайтед”нинг собиқ ҳужумчиси Уэйн Руни Хосеп Гвардиола “Манчестер Сити”ни тарк этса, Англия Премьер-лигасида чемпионлик учун кураш анча қизиқарли тус олишини айтди.
Рунининг фикрича, Пепдан кейин “Манчестер Сити” ҳозиргидек барқарор ва муваффақиятли бўлиб қолишига ҳеч қандай кафолат йўқ. У бу борада сэр Алекс Фергюсон “Манчестер Юнайтед”ни тарк этганидан кейинги даврни мисол қилиб келтирди. Шунингдек, Арсен Венгердан кейин “Арсенал”да Унаи Эмери учун вазият қанчалик оғир кечганини ҳам эсга олди.
“Ман Сити” Пепдан сўнг ҳозиргидек муваффақиятли бўлишига ҳеч қандай ишонч йўқ. Менимча, уларда муаммолар бўлади. Ахир Фергюсоннинг ўрнини босиш қанчалик қийин бўлганини кўрдик. Худди Эмери “Арсенал”га келганида Венгернинг ўрнини босиш қанчалик оғир кечгани каби”, — деди Руни.
Собиқ ҳужумчига кўра, масала фақат Гвардиоланинг ўрнига ким келиши билан чекланмайди. Пепнинг обрўси, жамоага таъсири, ўйин фалсафаси ва ҳатто трансфер сиёсатидаги роли ҳам “Сити” учун жуда катта аҳамиятга эга.
Руни Энцо Мареска “Манчестер Сити” бош мураббийига айланиши мумкинлиги ҳақидаги хабарларга ҳам тўхталди. Унинг фикрича, Мареска яхши мутахассис бўлиши мумкин, аммо Пеп даражасида клубга таъсир ўтказиши осон эмас.
“Айтишларича, Мареска келар экан, лекин мен у Пепдек таъсир қилади, деб ўйламайман. Ростдан ҳам чемпионлик масаласи янада очиқ бўлади ва келаси мавсумда АПЛдаги кураш жуда қизиқ кечади”, — деди Руни.
Унинг фикрича, келаси мавсумда Англия чемпионатида вазият анча ноаниқ бўлиши мумкин. “Сити”да янги мураббий бўлиши кутиляпти, “Челси”да ҳам ўзгаришлар бор. Руни “Манчестер Юнайтед” ва “Арсенал”да ҳам айрим янгиланишлар бўлиши эҳтимолини истисно қилмади.
Шу сабаб у АПЛдаги чемпионлик пойгаси аввалгидан кўра очиқроқ, кескинроқ ва олдиндан тахмин қилиш қийинроқ бўлишини таъкидлади.
Қисқаси, Руни Пеп кетса, “Сити” автоматик равишда аввалгидек ҳукмронлик қилавермайди, деб ҳисобламоқда. Гвардиола кетиши — фақат мураббий алмашинуви эмас, бутун тизим учун катта синов. АПЛ учун эса бу янги интрига: чемпионлик пойгаси яна “ким олади?” режимига қайтиши мумкин.
“Zamin”ни Telegram'да ўқинг!
