Атлетико Мадрид сардори Коке Испания чемпионатининг сўнгги турида Вилярреалга қарши кечган ва 5:1 ҳисобидаги мағлубият билан якунланган ўйиндан сўнг жамоасининг мавсумдаги иштирокига кескин баҳо берди. Тажрибали ярим ҳимоячи Ла Лигада учинчи ўринни қўлдан бой берган Лос Колчонероснинг натижаларидан қаттиқ норози эканини яширмади. Бу ҳақда Goal.com хабар беради.
2025-26-йилги мавсум Атлетико Мадрид учун Ла Серамика стадионидаги даҳшатли мағлубият билан якунланди. Диего Симеоне шогирдлари Вилярреални қувиб ўтиб, кучли учликка кириш учун ғалаба қозониши шарт бўлган баҳсда рақибга йирик ҳисобда имкониятни бой берди. Коке учун бу натижа Метрополитано жамоасидан кутилган стандартларга мос келмайдиган ички чемпионатнинг мантиқий якуни бўлди.
Мовистар+ нашрига берган интервюсида 34 ёшли футболчи жамоанинг барқарорлик етишмаслигидан ғазабда эканини билдирди: «Оғизда аччиқ таъм қолди. Чемпионлар лигаси ҳаяжонли ўтди, Кубокда пеналтилар серияси бўлди, аммо Ла Лигада биз фалокатга юз тутдик. Чунки чемпионлик учун кураша олмадик. Биз жадвалда анча юқорида бўлишимиз керак эди, бу натижа кейинги мавсум учун дарс бўлиши лозим».
Сардорнинг кескин сўзларига қарамай, Диего Симеоне жамоасининг умумий меҳнатига ижобийроқ ёндашди. Аргентиналик мутахассис Чемпионлар лигаси ярим финали ва Испания кубоги финалига қадар етиб борилганини тараққиёт белгиси сифатида қайд этди. Унинг сўзларига кўра, жамоа 61 та ўйин ўтказган ва мавсум «яхши ва жуда яхши» оралиғида ўтган.
Симеоне, шунингдек, замонавий футболдаги кучли босим ҳақида гапириб, Пеп Гуардиола каби чарчоқ ҳис қилаётганини тан олди. «Кеча Гуардиоланинг матбуот анжуманидаги сўзларини ўқидим. Мен у каби кўп соврин ютмаган бўлсам-да, унинг ҳикоясини ўзимга жуда яқин олдим. Ҳар уч кунда ўйинга чиқиш, гуруҳни бошқариш ва доимий диққат марказида бўлиш тўхтамайдиган қор уюмини ҳосил қилади», — дея қўшимча қилди мураббий.
“Zamin”ни Telegram'да ўқинг!
