Ўзбекистон миллий терма жамоасининг 2026 йилги Жаҳон чемпионатидаги иштироки нафақат мамлакатимиз, балки бутун Марказий Осиё футболи учун тарихий воқеа сифатида баҳоланмоқда. Вакилларимиз минтақа давлатлари орасида биринчи бўлиб футбол бўйича жаҳон чемпионатининг финал босқичида майдонга тушади.
Шу боис Ўзбекистон терма жамоасига қўшни мамлакатлардан ҳам катта қизиқиш ва қўллаб-қувватлов билдирилмоқда. Қозоғистон миллий терма жамоасининг собиқ сардори Самат Смаков ҳам “оқ бўрилар”нинг ЖЧ-2026даги имкониятлари ҳақида фикр билдириб, Ўзбекистон футболининг ўсишини юқори баҳолади.
Смаковнинг таъкидлашича, Ўзбекистон миллий жамоаси гуруҳдаги рақибларга қарши муносиб ўйин кўрсатиш имкониятига эга. У Португалия фаворит эканини тан олган ҳолда, қолган жамоаларга қарши курашиш мумкинлигини айтди. Ҳатто португаллар билан ҳам тўғри тактика орқали баҳс олиб бориш мумкинлигини қайд этди.
“Португалияни ҳисобга олмасак, қолган барча жамоаларга қарши ўйнаш мумкин, ҳатто португалларга қарши ўйнаса ҳам бўлади”, — деди Смаков.
Қозоғистонлик мутахассиснинг фикрича, замонавий футболда жамоалар ўйнашни ҳам, ҳимояланишни ҳам яхши ўрганиб олган. Агар терма жамоа тартибли ҳимояланса, рақиб учун уни ёриб ўтиш осон бўлмайди. Бу фикр айниқса Жаҳон чемпионати каби катта турнирларда янада долзарб аҳамият касб этади.
“Футбол яна бир бор шуни кўрсатмоқдаки, ҳамма ўйнашни ҳам, ҳимояланишни ҳам ўрганган. Агар жамоа яхши ҳимояланса, уни ёриб ўтиш жуда қийин бўлади”, — дея таъкидлади у.
Смаков Ўзбекистонни Қозоғистон учун қўшни ва биродар мамлакат деб атади. У қозоғистонликлар ҳам Ўзбекистон терма жамоаси учун қайғуришини, жамоамизнинг муваффақияти бутун минтақа учун фахрли воқеа эканини билдирди.
Собиқ футболчининг айтишича, Ўзбекистон сўнгги ўн йилликда футбол инфратузилмасига жиддий сармоя киритди. Базалар, стадионлар, академиялар ва тайёргарлик тизимига эътибор қаратилгани бугун ўз натижасини бермоқда. Жаҳон чемпионатига чиқиш айнан шу узоқ муддатли меҳнатнинг самараси сифатида кўрилмоқда.
“Ўзбекистон — бизнинг қўшнимиз, биродар мамлакат, биз улар учун қайғурамиз. Улар 10 йил аввал футболга сармоя киритишни, базалар ва стадионлар қуришни бошлаган эди ва ҳозир бу ўз самарасини берди”, — деди Смаков.
У Қозоғистонда ҳам футбол академиялари ва стадионлар қурилаётганини, аммо бундай жараёнларда натижани тез кутиш тўғри эмаслигини таъкидлади. Унинг фикрича, футболда катта натижа учун вақт, тизим ва сабр керак.
Ўзбекистон миллий терма жамоаси ЖЧ-2026да “К” гуруҳидан жой олган. Фабио Каннаваро шогирдлари гуруҳ босқичида Португалия, Колумбия ва Конго Демократик Республикаси терма жамоаларига қарши майдонга тушади.
Албатта, бу гуруҳ осон эмас. Португалия юлдузларга бой таркиби билан фаворитлардан бири ҳисобланади. Колумбия жисмонан кучли ва техник футболчиларга эга. Конго ДР эса тезкор, атлетик ва курашувчан жамоа сифатида хавфли рақиб саналади. Аммо Смаков айтганидек, замонавий футболда интизомли ва тўғри тайёрланган жамоа ҳар қандай рақибга муаммо туғдириши мумкин.
Қисқаси, Самат Смаков Ўзбекистон терма жамоасининг ЖЧ-2026даги имкониятларини ижобий баҳолади. У Ўзбекистон футболи сўнгги йилларда катта ўсишга эришганини ва бугунги натижалар бежиз эмаслигини таъкидлади. Қўшнилар ҳам биз билан бирга ҳаяжонда — энди “оқ бўрилар” майдонда Марказий Осиё овозини баландроқ эшиттириши керак.
“Zamin”ни Telegram'да ўқинг!
