Мюнхеннинг Бавария клуби Энтони Гордон трансфери амалга ошмагач, эътиборини Англия Премер-лигасининг ёш юлдузига қаратди. Маълумотларга кўра, немис гранди АФК Борнмут ҳужумчиси Жуниор Кроупи номзодини кўриб чиқмоқда. 19 ёшли иқтидор эгаси ўзининг техник маҳорати ва совуққонлиги билан кўплаб грандлар назарига тушган. Бу ҳақда Goal.com хабар беради.
Жуниор Кроупи трансфери Бавария учун арзон тушмайди. Борнмут ўзининг иқтидорли футболчисини камида 80 миллион еврога баҳоламоқда. Футболчининг амалдаги шартномаси 2030-йилга қадар давом этади. Шунингдек, ушбу трансфер пойгасида Барселона, Манчестер Сити ва Арсенал каби жамоалар ҳам иштирок этиши кутилмоқда.
Франциялик афсонавий ҳужумчи Тьерри Анри Жуниор Кроупи ҳақида юқори фикр билдирган. "Унинг ривожланишидан ҳайратда эмасман. Мен уни 16 ёшидаёқ ёшлар терма жамоасига чақирмоқчи эдим. Ундаги туғма иқтидор ва қатъиятни кўрганимда, ёшининг аҳамияти қолмайди", — дея таъкидлади Генри.
Кроупи ўз фаолиятини Франциянинг Лорян клубида бошлаган ва 16 ёшида Лига 1да дебют қилган. Борнмут сафига ўтгач, у Англия Премер-лигасида ҳам ўзини кўрсата олди ва ўтган мавсумда 33 ўйинда 13 та гол уришга муваффақ бўлди. У майдонда ҳам марказий ҳужумчи, ҳам қанотларда ҳаракат қила оладиган универсал футболчи ҳисобланади.
Бавария раҳбарияти Кроупини Луис Диазга рақобатдош ва Гарри Кейн учун муносиб ўринбосар сифатида кўрмоқда. Аввалроқ мюнхенликлар Энтони Гордонни сотиб олмоқчи эди, бироқ Нюкасл Юнайтед ҳужумчиси Барселона сафига ўтишга яқин турибди.
“Zamin”ни Telegram'да ўқинг!
