Реал Мадрид собиқ ярим ҳимоячиси Гути Хаби Алонсо кутилмаганда истеъфога чиқарилгани борасида ўз фикрларини билдирди. Унинг фикрича, мураббийнинг Сантиаго Бернабеу стадионини бунчалик тез тарк этишига кийиниш хонасидаги "жуда жиддий ва йирик" можаро сабаб бўлган. Алонсо январ ойида, тайинланганидан бир неча ой ўтиб ишдан бўшатилган эди. Бу ҳақда Goal.com хабар беради.
Гути Икер Касиллас билан бирга иштирок этган "Бажо лос палос" кўрсатувида Флорентино Перезнинг қарорини таҳлил қилди. "Хаби Алонсо беш ойлик ёки бир йиллик лойиҳа эмас эди, у узоқ муддатли режаларнинг бир қисми эди. Флорентино Перезни яхши билган ҳолда айтишим мумкинки, у ичкарида бирор жиддий воқеа содир бўлмагунча бундай қарор қабул қилмайди. Менимча, кийиниш хонасида ғалати ишлар бўлган", — деди Гути.
Шунингдек, собиқ футболчи жамоанинг ҳозирги ҳолатини ҳам танқид остига олди. Унинг сўзларига кўра, Реал Мадрид таркибида мувозанат ва жамоавий руҳ етишмаяпти. Гути жамоа ўйин жиҳатидан Винисиус Жуниор ва Килиан Мбаппе каби юлдузларнинг индивидуал маҳоратига ҳаддан ташқари боғланиб қолганини таъкидлади.
Гути кийиниш хонасидаги муҳит ўзгаргани, маҳаллий футболчилар камлиги жамоа жипслигига салбий таъсир кўрсатаётганини қўшимча қилди. Унинг фикрича, дунёнинг турли бурчакларидан келган юлдузлар билан мустаҳкам гуруҳ шакллантириш аввалгидан кўра қийинлашган. Ҳозирда клуб янги мураббий излаш ва 7-июн куни бўлиб ўтадиган президентлик сайловларига тайёргарлик кўриш билан банд.
“Zamin”ни Telegram'да ўқинг!
