Атлетико Мадрид клуби ҳужумчи Хулиан Альварес атрофидаги миш-мишларга жавобан Барселона устидан ғайритабиий тарзда кулди. Мадридликлар ижтимоий тармоқларда каталонияликларнинг юлдузлари — Ламине Ямал, Рафинья ва Педри гўёки Атлетико Мадрид либосини кийиб тушган суратларини эълон қилди. Бу ҳаракат Барселона томонидан аргентиналик ҳужумчини ўз сафига қўшиб олиш борасидаги асоссиз хабарларга нисбатан пародия сифатида амалга оширилди. Бу ҳақда Goal.com хабар беради.
Клуб ижтимоий тармоқларда ушбу футболчилар учун ҳажвий "таклифлар" ҳам эълон қилди. Масалан, Ламине Ямал учун концерт чипталари, йиллик обуна ва бир қоп писта таклиф қилинди. Бу орқали Атлетико Мадрид раҳбарияти Барселона томонидан тарқатилаётган трансфер хабарларини қанчалик ҳақиқатдан йироқ ва кулгили деб ҳисоблашини кўрсатиб қўйди. Шунингдек, клуб "кўк-анорранглилар"нинг молиявий ҳолатига ишора қилувчи махсус видео ҳам жойлаштирди.
Атлетико Мадрид баёнотида каталонияликларни Хулиан Альвареснинг нархини тушириш ва футболчига босим ўтказиш учун "қора кампания" юритишда айблади. "Биз сохта пост яратиш учун бор-йўғи беш дақиқа вақт сарфладик. Ҳозирги даврда ҳақиқатни осонгина ўзгартириш мумкин. Кўрган ҳамма нарсангизга, айниқса у Барселона билан боғлиқ бўлса, ишонаверманг", — дейилади клуб хабарида.
Мадридликлар ўз баёнотида Барселона тарихидаги ҳакамлар билан боғлиқ можаролар ва сиёсий ёрдамлар орқали футболчиларни рўйхатдан ўтказиш ҳолатларига ҳам кескин ишора қилиб ўтди. Клуб Хулиан Альварес сотилмаслигини ва унинг трансфер нархи 130 миллион фунт стерлингдан кам эмаслигини яна бир бор таъкидлади. Атлетико Мадрид ўз юлдузини сақлаб қолиш учун ҳар қандай ташқи босимга очиқчасига жавоб беришга тайёрлигини намойиш этди.
Ҳозирча Барселона томони ушбу айбловларга расмий муносабат билдирмади. Бироқ, икки клуб ўртасидаги муносабатлар ёзги трансфер ойнаси очилиши арафасида ниҳоятда таранглашган. Испания Ла Лигаси доирасидаги ушбу қарама-қаршилик энди нафақат майдонда, балки трансфер бозорида ҳам қизғин тус олмоқда.
“Zamin”ни Telegram'да ўқинг!
