Арсенал бош мураббийи Микел Артета Чемпионлар лигаси финалидаги мағлубиятдан сўнг клуб раҳбариятини трансфер бозорида янада фаол бўлишга чақирди. Гарчи Лондон клуби ушбу мавсумда Англия Премер-лигасида ғолиб чиққан бўлса-да, Будапештдаги финалда Пари Сен-Жермен жамоасига пеналтилар сериясида 4:3 ҳисобида имкониятни бой берди. Артета рақиб жамоани ҳозирги вақтда "дунёнинг энг кучлиси" деб атади. Бу ҳақда Goal.com хабар беради.
Пускас Арена майдонидаги баҳсдан сўнг Артета ёзги трансфер ойнасида жиддий қарорлар қабул қилиниши кераклигини таъкидлади. Унинг фикрича, Европа элитаси билан фарқни йўқотиш учун клуб "жуда амбицияли, тезкор ва ақлли" ҳаракат қилиши лозим. Хабарларга кўра, Арсенал ҳужум чизиғини кучайтириш учун Атлетико Мадрид ҳужумчиси Хулиан Альварес номзодини асосий мақсад сифатида кўриб чиқмоқда.
Ўйин давомида PSJ тўп назорати бўйича мутлақ устунликка эга бўлди (75,3%). Артета Луис Энрике жамоасининг техник устунлигини эътироф этар экан, шундай деди: "PSJни ва хусусан Луисни табриклайман, чунки улар менинг фикримча дунёнинг энг яхши жамоаси. Уларнинг тўп билан ва индивидуал ҳаракатларда нималарга қодирлигини илгари кўрмаганман. Улар бизни ўзимиз истамаган услубда ўйнашга мажбур қилишди".
Учрашув ҳакамлик борасидаги баҳслардан ҳам холи бўлмади. Артета қўшимча бўлимларда Нуно Мендес томонидан Нони Мадуеке га нисбатан ишлатилган қўполлик учун пеналти берилмаганидан норози бўлди. Мураббийнинг сўзларига кўра, бу вазият ўйин тақдирини ўзгартириши мумкин эди, бироқ ҳакамнинг қарори Арсенал зарарига ишлади.
“Zamin”ни Telegram'да ўқинг!
