Испаниянинг Mundo Deportivo нашри тарқатган хабарга кўра, Барселона клуби Ливерпул жамоасининг собиқ ҳужумчиси Дарвин Нунез номзодини кўриб чиқмоқда. Ҳозирда Саудия Арабистонининг Ал-Ҳилол клуби билан шартномага эга бўлган уругвайлик форвард кутилмаганда каталонияликлар радарига тушиб қолди. Бу ҳақда Goal.com хабар беради.
Айни дамда Барселона раҳбарияти Ал-Ҳилол билан ҳимоячи Жоау Канцело трансфери бўйича музокаралар олиб бормоқда. Маълумотларга кўра, ушбу мулоқотлар давомида Саудия клуби Дарвин Нунез вариантини ҳам таклиф қилган. 26 ёшли ҳужумчи феврал ойидан бери легионерлар лимити сабабли қайдномадан ташқарида қолиб келмоқда.
Дарвин Нунез ўтган ёзда Ливерпул сафидан 53 миллион евро эвазига Ал-Ҳилолга кўчиб ўтган эди. У жамоа сафида 24 та ўйинда 9 та гол ва 5 та ассист қайд этишга улгурди. Бироқ, Карим Бензема ва бошқа юлдузлар келиши ортидан у таркибдан тушиб қолди. Миррор нашрининг ёзишича, унинг шартномаси ўзаро келишувга кўра бекор қилиниши ва у эркин агент сифатида Барселона сафига ўтиши мумкин.
Барселона учун Дарвин Нунез варианти фақатгина Атлетико Мадрид ҳужумчиси Хулиан Альварес трансфери амалга ошмаса, асосий режага айланади. Каталонияликлар Роберт Левандовски ўрнига айнан аргентиналик юлдузни олиб келмоқчи, бироқ Атлетико Мадрид уни 100 миллион евродан камига қўйиб юбормаслигини маълум қилган.
Молиявий қийинчиликларга қарамай, Барселона келаси мавсум учун Антонй Гордон трансферини ҳал қилиб бўлган. Нюкасл Юнайтеддан 80 миллион евро эвазига сотиб олинган инглиз ярим ҳимоячиси жамоанинг ҳужум салоҳиятини ошириши кутилмоқда. Дарвин Нунез масаласи эса яқин ҳафталарда ойдинлашади.
“Zamin”ни Telegram'да ўқинг!
