ЖЧ финали қайта ўтказиладими? 61 мингдан ортиқ мухлис FIFA'га талаб билан чиқди

2026 йилги Жаҳон чемпионати финалида Испания терма жамоасига мағлуб бўлган Аргентина мухлислари FIFA'дан ҳал қилувчи учрашувни қайта ўтказишни талаб қилмоқда. Айни вақтга келиб, мазкур талабни қўллаб-қувватлаганлар сони 61 мингдан ошди.

Жорий йилнинг 19 июль куни Нью-Йорк шаҳрида бўлиб ўтган финал баҳсида Испания қўшимча вақтда Аргентинани 1:0 ҳисобида мағлуб этиб, Жаҳон чемпионлигига эришган эди. Бироқ ўйиндан кейин аргентиналик мухлислар бош ҳакам Славко Винчичнинг айрим қарорларидан норози бўлиб, ижтимоий тармоқларда кенг муҳокамаларни бошлаб юборди.

Учрашув тугаганидан сўнг Change.org платформасида FIFA'дан финални қайта ўтказишни талаб қилувчи онлайн петиция эълон қилинди. Ҳозирга қадар ушбу мурожаатни 61,5 мингдан ортиқ киши имзолаган бўлиб, бу кўрсаткич ортишда давом этмоқда.

Петиция муаллифи Гисела Санчеснинг таъкидлашича, словениялик ҳакам Славко Винчичнинг бир қатор баҳсли қарорлари ўйин тақдирига сезиларли таъсир кўрсатган. Унинг фикрича, айрим эпизодларда қабул қилинган қарорлар Аргентина терма жамоаси манфаатларига зид бўлган ва финал натижасига таъсир қилган.

Эътиборлиси, 2026 йилги Жаҳон чемпионати давомида бу каби ҳолат илк бор кузатилаётгани йўқ. Аввалроқ Франция ва Испания ўртасидаги ярим финалдан кейин ҳам 82 мингдан ортиқ француз мухлиси баҳсли пенальти қарори сабаб учрашувни қайта ўтказишни талаб қилиб петицияга имзо чеккан эди. Аммо ўша ҳолатда ҳам FIFA расмий натижани ўзгартирмаган ва мусобақа натижалари ўз кучида қолган.