22:29 / 29.01.2018

Шавкат Мирзиёев: "Футболчиларимиз коррупция бўлмаса, қандай натижаларга эришиш мумкинлигини исботлади" (видео)

Ўзбекистон Президенти Шавкат Мирзиёев 28 январь, якшанба куни Қашқадарё вилоятида бўлиб ўтган фаоллар йиғилишида футбол бўйича Ўзбекистон U23 терма жамоасининг Осиё чемпионатидаги муваффақиятига ҳам тўхталиб ўтди, деб ёзади Дарё.

Ҳаммасига янги Malibu топширдим. Куни кеча табрик йўлладим. Бу нимадан далолат? Кеча жанг бўлди. Кеча ҳақиқий қаҳрамонлик бўлди. Миллатимиз нималарга қодир эканлигини кўрсатиб қўйишди.

Биласизларми, ўйин вақти одамнинг юраги шундай санчиб ўтирдики! Йигитлар ўзини аямай, «Менда Амир Темур қони бор, мен ўзбекман!», деб шундай жасорат билан ғалаба қозонди.

Футболни мен ўзим қўлга олганман. Ичини тозаладик. Ёш-ёш, таниш-билиш бўлмаган болаларни саралаб олдик. Булар — ҳақиқий жайдари болалар. Ҳеч бирининг ортида одами ҳам йўқ, ҳеч кими йўқ. Бу жамоада қашқадарёликлардан ҳам уч футболчи бор.

Агар адолат бўлса, коррупция бўлмаса, нима бўлиши мумкинлигини кеча футбол кўрсатиб қўйди. Бу миллатимизнинг ғурури. Ҳамма соҳада шундай ишласак, биласизларми, шундай зўр кучларимиз бор.

Футбол — жуда катта, оммабоп ўйин. Футбол — бизга маъқул ўйин. Биз бундан буёғи футболга давлат миқёсида жуда катта аҳамият берамиз.

Шавкат Мирзиёев, Ўзбекистон Президенти

Эслатиб ўтамиз, футбол бўйича Ўзбекистон U23 терма жамоаси 27 январь январь куни Осиё чемпионати финалида Вьетнам термасини қўшимча вақтда 2:1 ҳисобида мағлуб этиб, ўз тарихида илк бор Осиё чемпиони бўлди.

Ўйин якунига етиши билан Ўзбекистон Президенти Шавкат Мирзиёев ўзбекистонлик чемпион футболчиларга табрик йўллади. Терма жамоа делегациясини 28 январь оқшомида Ўзбекистон бош вазири Абдулла Арипов кутиб олди.