Нима сабабдан «Рома»ни танлагани, «Женоа»даги ёрқин мавсум ва келажаги ҳақида — Элдор Шомуродов

^{Фото: «Рома»}
Элдор Шомуродов «Рома»га ўтганидан сўнг клуб матбуот хизматига интервью берди.

Қандай ҳиссиётларни бошдан кечираётгани ҳақида
Кучли ҳаяжондаман. Бу мен учун улкан қадам. Нимага қодирлигимни кўрсатиб, мухлисларни хурсанд қилишга ҳаракат қиламан.

А Сериядаги илк мавсумидан сўнг «Женоа»даги ажойиб муҳитни ташлаб «Рома»га ўтгани ҳақида
Бу менинг биринчи мавсумим эди ва кучли жиҳатларимни намоён этишга уриндим. Баъзи жабҳаларда яхши бўлсам, баъзи жойларда хатоларга йўл қўйдим — буни биламан. Шунга қарамасдан ўтган мавсумдан мамнунман.

Мавсуминг иккинчи ярмида натижалари яхшилангани ҳақида
Илк мавсумим эди ва мослашиш учун мендан вақт талаб қилинарди. Бу асосий сабаб. Кейинчалик ўйин тезлигига, жамоадошларимга ва рақиб жамоаларининг ҳимояланиш услубига мослашиб олдим. Ўйлайманки, мавсум охирида яхши ўйнадим. Қандай ўйнаш кераклигини аллақачон ўрганиб олгандим.

А Серияда кўпроқ нима қизиқтиргани ҳақида
Биринчи навбатда жамоанинг савияси ва мен бирга ўйнаган футболчилар. Иккинчидан, ўйин тезлиги ва ҳиссиётлар мени ҳайратга солди.

«Ростов»даги давридан кўра қанчалик ўзгаргани ҳақида
Қанчалик ўзгарганимни баҳолашим қийин. Бу ишни ўйинларни томоша қиладиган мухлислар амалга оширгани маъқул. Жамоа натижаларига таъсир кўрсата олган пайтимда — ўзимга бўлган ишончим ортади.

«Рома»даги мақсадлари ҳақида
Жамоага соврин ютишда, катта мақсадларни амалга оширишда ёрдам беришни истайман. Қўлимдан келган барча нарсани қиламан. Ривожланишда давом этмоқчиман.

Ҳужумнинг исталган нуқтасида ўйнай олиши, қайси бири ўзига кўпроқ ёқиши ҳақида
Тўғрисини айтсам, ҳужумда ўйнаш ёқимли. Ҳужумда мен қанот ёки марказий ҳужумчилар позицияларини бемалол алмаштира оламан. Ҳужумда ўзимни қулай ҳис қиламан.

Жуда кўп таклифлар ичидан нега айнан «Рома»ни таклифини қабул қилгани ҳақида
«Рома» — Италиянинг энг яхши жамоаларидан бири. Ўйин пайтида мухлислар жамоани қандай қўллаб-қувватлаганини кўрдим. Авваллари «Рома»нинг ўйинларини кузатиб борардим. Барчаси тез ҳал бўлди, айнан шу жамоа мени ҳаммадан кўп ўз сафида кўришни хоҳлади ва тез ҳаракат қилди. Шу тариқа мен шу ердаман. Бошқа сабаб эса мен олдимга доим катта мақсадлар қўяман. Шунинг учун бу мен учун жуда муҳим эди.

Римдаги биринчи ўзбек футболчиси эканлиги ҳақида
Бу мен учун фахр. «Женоа»га ўтганимда ҳам одамлар мени қанчалик қўллаб-қувватлаганини кўрдим. Энди улар янада кўпроқ қўллаб-қувватлайди, чунки улар мен қандай катта жамоада ўйнашимни билади. Бу жуда катта фахр.

Мухлисларга тилаклари
Мухлисларга салом йўлламоқчиман. Бизни қўллаб-қувватлашда ва ишонишда давом этинг! Сизни хурсанд қилиш учун қўлимиздан келган барча ишни қиламиз!

Рим клуби Элдор Шомуродовни «Женоа»дан 17,5 миллион евро эвазига харид қилди. Шомуродов «Рома» билан 2026 йил 30 июнига қадар мўлжалланган шартнома имзолади. Ўзбекистон миллий терма жамоаси ҳужумчиси янги клуби сафида 14-рақамда ҳаракат қилади.

Шомуродов 2020/21 йилги мавсум бошида «Ростов»дан 7,5 миллион евро эвазига «Женоа»га ўтганди. Бунгача у «Машъал» ва «Бунёдкор» клубларида тўп сурган. Элдор ортда қолган мавсумда А Серияда 31 та ўйин ўтказиб, 8 та гол уришга муваффақ бўлди. “Замин” янгиликларини “Facebook”да кузатиб боринг