Шомуродов даражасини кўрсатиб қўйди! Италия матбуоти легионеримиз ўйинини қандай баҳолади?

“Рома”нинг А Сериядаги мағлубиятсиз серияси 13-учрашувга келиб тўхтади. А Сериянинг 34-турида Жозе Моуриньо шогирдлари Миланга бориб, амалдаги чемпион “Интер” меҳмони бўлди.

“Интер” мухлислари Жозе Моуриньони ҳам, римлик футболчиларни ҳам илиқ қарши олди. Чунки улар Жозе Моуриньо ўз даврида “Интер”ни катта ғалабаларга етаклагани ва қудратли жамоага айлантирганини унутгани йўқ.

Ўйинда устунлик мезбонлар томонида бўлди ва Симоне Индзаги шогирдлари бунинг самарасида 51-дақиқагача учта гол уриб, учрашув тақдирини ҳал қилиб қўя қолди. “Рома” охирги ўн дақиқаликда захирадан тушган ўйинчилар ҳаракати билан ўйинни ўз қўлига олди.

Италия футболига ихтисослашган www.calciomercato.com мутахассислари учрашувдан сўнг “Рома” футболчилари ҳаракатларини қуйидагича баҳолади.

Руй Патрисио, 5.5 балл:
Тажрибали посбон Думфрис ва Брозович зарбалари қаршисида ожиз қолди. Лаутро гол урган вазиятда ҳам жамоасини қутқариши мумкин эди.

Жанлука Манчини, 5 балл:
Манчини Брозовичга қаршилик кўрсата олмади ва хорват футболчиси жамоаси ғалабасини мустаҳкамлади.

Крис Смоллинг, 5 балл:
Брозовичнинг финтига алданиб, унинг аниқ зарба беришига тўсқинлик қила олмади. Ўз даражасида ўйнагани йўқ.

Рожер Ибаньес, 6 балл:
Мудофаа вакиллари орасида бор эътиборини ўйинга қарата олган ягона ҳимоячи бўлди.

Рик Карсдорп, 5 балл:
Ҳужумга қўшилишида жуда кўп камчиликлари кўзга ташланмоқда. Бу гал Рик ҳимояланишда ҳам панд бериб қўйди. Иван Перишич Карсдорпни анча қийнаб қўйди.

Генрих Мхитарян, 6 балл:
Ҳар доимгидек фойдали ўйнашга ҳаракат қилди. Бироқ бу гал ҳимоячилар олдида имконияти чеклангани кўриниб қолди. Элдор Шомуродовнинг жуда қулай пасидан кейин гол уришга эришди.

Сержиу Оливейра, 5 балл:
Олдинга ўтишни уддалай олмади. Жуда бўш ўйнади.

Никола Залевски, 5 балл:
Моуриньо чап қанотни эгаллашини тайинлаган Залевски ҳимоя чизиғидан олдинга чиқа олмади. Барелла ва Демфрис унга ўйин бермади.

Лоренцо Пеллегрини, 5 балл:
Тўпни кўп йўқотди. Ўзидан кутилган ўйинни намойиш қила олмади. Ўрнини Жордан Веретуга бўшатиб берди.

Жордан Верету, 6 балл:
Ўйинга тушиши билан “Рома” майдон марказини қўлга олди.

Стефан Эл-Шаарави, 5 балл:
Шкриньяр ва Перишич Стефанга ҳеч қандай имконият қолдирмади. Ўрнига Карлес Перес тушди.

Карлес Перес, 6 балл:
Анча фаол ўйнади. Бир вазиятда тўпни қулай позицияда турган Шомуродовга узатмади. Очиқчасига қизғанчиқлик қилди ва римликлар ҳисобни қисқартириш имконини қўлдан бой берди.

Тэмми Абрахам, 5 балл:
Жамоадан узилиб қолди. Жамоадошларини прессинг қилишга ундаган бўлса-да, бунинг имкони бўлмади. Ўрнини 78-дақиқада Элдор Шомуродовга бўшатиб берди.

Элдор Шомуродов, 6 балл:
Асосий вақтини захирада ўтказаётган ўзбек футболчиси ўзига берилган бир неча дақиқа ичида рақибнинг мустаҳкам ҳимоясини ёриб ўтди. Мхитаряннинг гол уриши учун жуда қулай тўп ошириб, ҳамон “Рома”га фойда келтириши мумкинлигини исботлаб қўйди.

Жозе Моуриньо, 5 балл:
“Рома”га “Интер” билан бўлган ўйинда янги ғоялар етишмади. Бу бош мураббийнинг камчилиги. “Замин” янгиликларини “Одноклассники”да кузатиб боринг