Элдор Шомуродов илк бор Англияда ўйнайди!

“Рома” УЕФА миқёсидаги учинчи мусобақа – Конференциялар лигасининг ярим финал биринчи учрашувида “Лестер Сити” билан Англияда куч синашади. Маълумотларга қараганда, Жозе Моуриньо замонавий футбол ватанига асосий таркибнинг барча ўйинчиларини олиб келган.

Ҳар икки жамоа олдида ушбу халқаро турнир бош совринини қўлга киритиш масъулияти турибди. Хусусан, “Рома” мавсум бошида ўз олдига қўйилган учта вазифадан иккитасини уддалай олмади. Яъни, Жозе Моуриньо шогирдлари бу мавсум А Серияда кучли тўртликдан жой ололмайди ва Чемпионлар лигасига йўлланмани қўлдан чиқарди ҳисоб. Шунингдек, “бўрилар” Италия кубогида ҳам юришини тўхтатган.

“Рома” учинчи вазифа – Конференциялар лигаси бош совринини қўлга киритишни ва мавсумни шу орқали муваффақият билан тугатишни режалаштирмоқда.

Пойтахт клуби Конференциялар лигасидаги иштирокини саралаш босқичидан бошлаб, кейинчалик гуруҳ беллашувларидан муваффақиятли ўтди. Италия клуби гуруҳ ғолиби сифатида юришини нимчорак финалдан давом эттириб, ярим финалгача Нидерландиянинг “Витесс” ва Норвегиянинг “Будё-Глимт” жамоалари тўсиғидан ўтиб келди.

Римликлар А Сериядаги бешинчи поғонани сақлаб қолса, келаси йили Европа лигасида ўйнайди. Конференциялар лигаси ғолибига ҳам бош совриндан ташқари келаси мавсум учун Европа лигаси йўлланмаси берилади.

“Лестер Сити”ни айнан мана шу омил қизиқтирмоқда. Брендан Рожерс шогирдлари мавсумни жуда бўш ўтказмоқда ва жамоа Англия премьер-лигаси жадвалининг ўрта қисмида жойлашган. Улар Еврокубокларга йўлланма берадиган поғоналардан узоқлашиб бўлган.

Бу мавсум халқаро майдондаги юришини Европа лигасидан бошлаган лестерликлар мусобақанинг гуруҳ босқичида учинчи ўринни эгаллаб, битта қуйидаги турнирга қўшилди. Конференциялар лигасининг ўтиш учрашувлари ва плей-офф босқичида англияликлар Даниянинг “Раннерс”, Франциянинг “Ренн” ва Нидерландиянинг ПСВ жамоаларини ортда қолдирди.

Конференциялар лигасини ютиш “тулкилар”нинг келаси мавсумдаги халқаро миқёсидаги фаолиятини кафолатлайди.

Мазкур омилларни инобатга олиб, ҳар икки жамоа ҳам мусобақа финалига чиқиш учун қаттиқ курашади.

“Лестер” билан бўладиган ўйингача Жозе Моуриньо шогирдлари А Серияда 12 та ўйиндан иборат мағлубиятсиз серия қайд этди. Ундан кейинги беллашувда амалдаги чемпион “Интер”га бой берилган учрашув ҳам Моуриньонинг кайфиятини бузгани йўқ. Португалиялик мутахассис собиқ жамоаси айни пайтда ҳозирги жамоасидан кучли эканини тан олиб қўя қолди. Миландаги ўша учрашув қаҳрамонларидан бири Элдор Шомуродов бўлди. Захирадан майдонга тушиб, римликлар ўйинини кучайтира олган легионеримиз “Интер”нинг мустаҳкам ҳимоясини ёриб ўтиб, Генрих Мхитарян гол уриши учун қулай вазият яратиб берди. Ўша учрашувнинг энг яхши ўйинчиларидан бири сифатида эътироф этилган Элдорга Жозе Моуриньо “Лестер”га қарши баҳсда имконият бериши кераклиги айтилмоқда.

- “Интер”га қарши ўйинда Шомуродовнинг ассисти “Рома”ни мағлубиятдан қутқара олмаган бўлса-да, мураббийлар штаби унга имконият бериши керак. Демак, Шомуродовни майдонда кутамиз, чунки у бунга муносиб эканини исботлади, - деб ёзди www.championat.com сайти.

Агар Жозе Моуриньо мураккаб учрашувда Шомуродовга ишонч билдирса, бу Элдорнинг Англиядаги илк ўйини бўлади.

“Рома” бош мураббий учрашувдан олдин фикр билдириб, жамоаларнинг имкониятини тенг баҳолади. Рақибнинг устунлиги сифатида ички чемпионатда юқори ўринлар учун курашиш босими йўқлиги учун Конференциялар лигаси беллашувларида хотиржам тўп тепиш имкониятини тилга олди.

“Лестер” бош мураббийи Брендан Рожерс: “Финалга чиқиш учун анча тер тўкишимизга тўғри келади. “Рома” зўр мураббий ва фантастик ўйинчиларга эга. Моуриньо ажойиб мураббий ва у туғма ғолиб”, деди.

“Лестер Сити” ва “Рома” учрашуви 28 апрель куни Тошкент вақти билан соат тунги 00:00 да бошланади. Жавоб учрашуви 5 май куни Римдаги “Олимпико” аренасида ташкил этилади. «Замин» янгиликларини «Вконтакти»да кузатиб боринг