Apple компанияси томонидан Mac ва iPhone фойдаланувчилари хавфсизлигини таъминлаш мақсадида жуда муҳим янгиланиш тақдим этилди. Бу ҳақда MacRumors портали маълум қилди.
Маълум қилинишича, июль ойининг охирларида тарқатилган iOS 18.6 ва macOS Sequoia 15.6 версияларида "CVE-2025-6558" деб белгиланган жуда хавфли заифлик бартараф этилган. Ушбу техник нуқсон хакерларга Chrome браузерининг ҳимоя тизимини четлаб ўтиб, қурилмада исталган кодни бажариш имконини берган.
Энг хавфли жиҳати — заифлик Apple тизимларидаги WebKit "движог"ига ҳам таъсир кўрсатган. Бу Safari браузери, шунингдек, Apple’нинг кўплаб иловаларида фаолият юритувчи компонент ҳисобланади. WebKit орқали зарарли веб-контент қайта ишланганда, тизимда хатолик юзага келиши мумкин бўлган.
Google мазкур заифликни 15 июль куни ўз браузерида бартараф этган бўлса-да, Apple платформаларига чуқур интеграциялашгани боис, iOS ва macOS тизимлари учун алоҳида “ҳимоя ямоғи” ишлаб чиқилган.
Айни пайтда ушбу заифлик қандай эксплуатация қилингани, техник жиҳатлари очиқланмаган. Чунки киберхавфсизлик компаниялари Google билан келишган ҳолда, фойдаланувчиларнинг катта қисми янгиланишни ўрнатмагунча техник маълумотларни ошкор қилмасликка қарор қилган.
«Замин»ни Telegram’да ўқинг!
