Бойқўнғирдан Союз-2.1а ракетаси Прогресс MS-34 кемасини коинотга олиб чиқди
Бойқўнғир космодромидан «Союз-2.1а» ракетаси «Прогресс МС-34» юк кемасини муваффақиятли тарзда коинотга олиб чиқди. Халқаро космик станцияни таъминлаш бўйича 95-миссия доирасида амалга оширилган ушбу парвоз натижасида кема икки суткадан сўнг станцияга туташиши кутилмоқда. Кема бортида жами 2,5 тоннадан ортиқ юк, жумладан, ёқилғи, сув, кислород ва экипаж учун янги скафандр каби зарур воситалар мавжуд.
Бойқўнғир космодромининг 31 майдончасидан "Союз-2.1а" ракета ташувчиси муваффақиятли старт олди. Ракета ўзи билан бирга "Прогресс MS-34" транспорт юк кемасини коинотга олиб чиқди. Бу ҳақда Ixbt.com хабар беради.
Парвоз штат режимида амалга оширилди.
"Роскосмос" давлат корпорацияси хабарига кўра, кеманинг орбитага чиқиши, учинчи поғонадан ажралиши ҳамда антенна ва қуёш панелларининг очилиши режа асосида кечган. Бу Халқаро космик станцияни таъминлаш бўйича 95-миссия ҳисобланади.
Ҳисоб-китобларга кўра, "Прогресс" кемасининг ХКСга етиб бориши 49 соат 39 дақиқа давом этади. Кема Ер атрофида 33 марта айланиб чиққач, 28 апрель куни Москва вақти билан соат 03:01 да "Звезда" модулига туташиши кутилмоқда.
Кема орбитага жами 2 518 кг юк олиб кетмоқда. Юклар таркибида станцияни ёнилғи билан тўлдириш учун 700 кг ёқилғи, 420 кг ичимлик суви ва 50 кг кислород мавжуд.
Шунингдек, экипаж учун 1 348 кг қуруқ юклар, жумладан, янги "Орлан-MKS" 8-сонли скафандри ҳам етказилади.
Изоҳлар 0
…