Илон Маскка тегишли "Неуралинк" компанияси ўз ишланмаларининг энг ёрқин намойишларидан бирини тақдим этди. Унда фалажланган беморлар роботлаштирилган қўлларни фақат фикр кучи ёрдамида бошқариши мумкинлиги кўрсатилди. Бу ҳақда Ixbt.com хабар беради.
"Неуралинк" технологияси асосида миядаги нейрон сигналларини ўқийдиган ва уларни ташқи қурилмалар учун буйруқларга айлантирадиган имплантация қилинадиган чип ётади. Фойдаланувчи ҳаракат ҳақида ўйлашининг ўзи кифоя, тизим эса овоз, имо-ишора ёки контроллерларсиз ҳаракатни бир зумда бажаради.
Ушбу намойиш компания учун муҳим босқич бўлди. Аввалроқ ушбу технология истиқболли концепция сифатида қаралган бўлса, энди "Неуралинк" реал натижаларни кўрсатмоқда.
Бу каби интерфейслар оғир жароҳат олган инсонларга ҳаракатланиш қобилиятини қайтариш вақтини яқинлаштиради.
"Неуралинк" — 2016 йилда Илон Маск томонидан асос солинган Америка нейротехнология компанияси ҳисобланади. Унинг асосий мақсади инсон мияси ва электрон қурилмалар ўртасида тўғридан-тўғри алоқа ўрнатувчи нейрокомпютер интерфейсларини яратишдир.
Дастлаб чиплар компютерни фикр кучи билан бошқариш имконини берган эди. Бундай қурилмага эга инсонлар курсорларни силжитиши, видеоўйинлар ўйнаши ва хабарлар ёзиши мумкин.
Шунингдек, кўзи ожизларга кўриш қобилиятини қайтаришга мўлжалланган "Неуралинк Блиндсигҳт" чипи ҳам ишлаб чиқилмоқда.
“Zamin”ни Telegram'да ўқинг!
