Интернетдаги ёшни текшириш тизимлари болалар учун тўсиқ бўла олмаяпти. Буюк Британиянинг Интернет Маттерс нотижорат ташкилоти ўтказган сўровномага кўра, болаларнинг ярми ёш чекловларини четлаб ўтиш жуда осон эканлигини таъкидлаган. Энг қизиқ усуллардан бири — юзга косметик қалам билан сохта мўйлов чизишдир. Бу усул сунъий интеллектга асосланган текширув воситаларини чалғитиб, болани катталар деб ўйлашига сабаб бўлмоқда. Бу ҳақда Techcrunch.com хабар беради.
Дунё бўйлаб ёшни текшириш қонунлари жорий этилмоқда. Кўпинча бу жараён фойдаланувчилардан ҳайдовчилик гувоҳномаси ёки паспорт нусхасини учинчи томон компанияларига юклашни талаб қилади. Танқидчилар эса бундай маълумотлар базаси хакерлик ҳужумлари учун хавфли эканлигини ва интернет эркинлигига таҳдид солишини айтишмоқда.
Apple каби технология гигантлари қонунларга мослашиш учун ўз қурилмаларига янгиланишларни жорий этди. Reddit ва Meta каби платформалар эса ҳужжатларни талаб қилиш ёки алгоритмлар ёрдамида фойдаланувчи ёшини тахмин қилиш усулларидан фойдаланмоқда. Discord каби бошқа хизматлар эса фойдаланувчиларнинг норозилиги ва хавфсизлик муаммолари туфайли бу жараённи кечиктиришга мажбур бўлди.
Болалар ёшни текшириш тизимларини алдашнинг бошқа йўлларини ҳам топишган. Масалан, веб-камерани видеоўйинлардаги катталар қиёфасидаги персонажларга қаратиш ёки ғалати юз ифодаларини қилиш орқали тизимни чалғитиш ҳолатлари кузатилмоқда. Бу эса жорий этилаётган технологик ҳимоя воситаларининг самарадорлигини шубҳа остига қўймоқда.
“Zamin”ни Telegram'да ўқинг!
