Хитойлик тадқиқотчилар эски мобил телефон аккумуляторлари ва ёғоч саноати чиқиндиларини натрий-ионли энергия тўплагичлари учун компонентларга айлантиришнинг янги усулини ишлаб чиқишди. Хенан педагогика университети ва Тсилун технология университети олимлари томонидан яратилган анод материали металлар ва лигниндан олинган углерод аралашмасидан иборат. Бу ҳақда Ixbt.com хабар беради.
Мутахассислар ишлатилган батареялардан металл бирикмаларини ажратиб олиб, уларни тозаланган лигнин билан аралаштиришди. Кимёвий ишлов бериш ва азот муҳитида карбонизация жараёнидан сўнг, материал асалари уясини эслатувчи ўзига хос ғовакли тузилишга эга бўлди. Бундай архитектура электролитнинг материал ичига осон кириб боришини таъминлайди ва натрий ионларининг ҳаракатини тезлаштиради.
Тадқиқот муаллифларининг таъкидлашича, лигнин шунчаки углерод қўшимчаси вазифасини бажармайди. У қайта ишлаш жараёнида Ко9С8 сульфид фазасини шакллантиришга ёрдам беради, бу эса анод ичида самарали икки фазали тузилмани ҳосил қилади. Бу ўз навбатида электр ўтказувчанликни оширади ва кўп марта қувватлаш ҳамда зарядсизланиш даврларида барқарорликни таъминлайди.
Синовлар давомида материал ҳар бир грамм учун 1060 мА·соатдан ортиқ бошланғич сиғимни намойиш этди. 300 та сиклдан сўнг ҳам материал ўз самарадорлигини сақлаб қолди. Ушбу технология келажакда электромобиллар, энергия сақлаш тизимлари ва портатив электроника учун арзон ҳамда экологик тоза аккумуляторлар ишлаб чиқаришда муҳим қадам бўлиши кутилмоқда.
“Zamin”ни Telegram'да ўқинг!
