SpaceX компаниясининг Starship ракетаси учун мўлжалланган Super Heavy Booster 19 биринчи поғонаси 33 та Raptor 3 двигатели билан ўтказилган муваффақиятли статик синовдан сўнг суратга олинди. Космик фотосуратчи Колин Лидтке томонидан олинган яқин масофадаги тасвирлар ракета корпусининг синовдан кейинги ҳолатини аниқ кўрсатиб берди. Бу ҳақда Ixbt.com хабар беради.
Суратларда корпус юзасида қора доғлар ва тутун излари кўзга ташланади. Мутахассисларнинг таъкидлашича, бу шикастланиш эмас, балки двигател чиқиндилари ҳамда шовқинни пасайтириш тизимидан келган сув аралашмасининг изларидир. Баъзи жойларда бўёқ кўчиши ва ҳимоя лентасининг қисман шикастлангани кузатилган бўлса-да, ракетанинг асосий конструкцияси бутунлигича қолган.
Янги авлод Raptor 3 двигателлари аввалги Raptor 2 моделларига нисбатан юқори тортиш кучи, самарадорлик ва енгиллик билан ажралиб туради. Энг муҳими, ушбу двигателлар интеграциялашган совутиш тизими туфайли ташқи иссиқлик ҳимоясига муҳтож эмас. Бу уларни ишлаб чиқаришни тўрт баробар арзонлаштиради ва кўп марта фойдаланиш имконини беради.
Starship — бу Илон Маскнинг SpaceX компанияси томонидан ишлаб чиқилаётган, тўлиқ қайта фойдаланиш мумкин бўлган ўта оғир ракета тизими. У юклар ва одамларни Ер орбитасига, Ойга ҳамда Марсга етказиш учун мўлжалланган. Бўлажак 12-парвоз Raptor 3 двигателлари билан жиҳозланган янги авлод Starship учун илк жиддий синов бўлади.
“Zamin”ни Telegram'да ўқинг!
