Геотермал энергетика соҳасида фаолият юритувчи Америка компанияси Ферво Энергй Насдақ биржасига чиққанидан сўнг ўз қийматини 10 миллиард доллардан оширди. ИПО жараёнида компания акциялари 30 фоиздан кўпроққа қимматлашди ва 1,89 миллиард доллар маблағ жалб қилинди. Бу 2013-йилдан буён АҚШ энергетика секторидаги энг йирик оммавий жойлаштириш бўлди. Бу ҳақда Ixbt.com хабар беради.
Бундай муваффақиятнинг асосий сабаби сунъий интеллект саноатининг жадал ривожланиши билан боғлиқ. ChatGPT каби технологияларни қўллаб-қувватловчи маълумотлар марказлари ва ҳисоблаш кластерлари узлуксиз ҳамда барқарор электр энергиясига бўлган талабни кескин оширмоқда. Ферво компанияси эса ўзининг илғор геотермал тизимлари (ЭГС) орқали айнан шу эҳтиёжни қондиришга қаратилган ечимларни таклиф этмоқда.
Google компанияси Ферво билан яқин ҳамкорлик ўрнатган бўлиб, 2024-йилда Невада штатидаги маълумотлар марказларини 100 МВ энергия билан таъминлаш бўйича шартнома имзолади. Шунингдек, Google компаниянинг 462 миллион долларлик молиялаштириш босқичига бошчилик қилган. Фервонинг Юта штатидаги Капе Статион лойиҳаси 2028-йилга бориб 500 МВ қувватга етиши ва дунёдаги энг йирик ЭГС-лойиҳасига айланиши кутилмоқда.
Технология гигантлари углеродсиз энергия манбаларига бўлган эҳтиёжни қондириш учун геотермал энергетикага тобора кўпроқ сармоя киритмоқда. Google'дан ташқари, Microsoft ва Meta ҳам ушбу йўналишда фаол ишламоқда. Microsoft Янги Зеландия ва Кения лойиҳаларига сармоя киритган бўлса, Meta ҳам ўзининг энергия таъминотини диверсификация қилиш учун геотермал компаниялар билан шартномалар имзолаган.
“Zamin”ни Telegram'да ўқинг!
