Роки-Маунтинс миллий лабораторияси олимлари қуёш энергиясини ўзгартиришнинг янги тизимини яратишди. Бу технология анъанавий қуёш панелларига қараганда анча самаралироқ ишлаш имкониятига эга. Янги ишланманинг асосий хусусияти шундаки, у қуёш нури ютилганда ҳосил бўладиган юқори энергияли зарралар — «иссиқ электронлар»ни узоқроқ вақт давомида ушлаб тура олади. Бу ҳақда Ixbt.com хабар беради.
Оддий қуёш панелларида ва ҳатто ўсимликларда қуёш нуридан олинган энергиянинг катта қисми деярли дарҳол иссиқлик сифатида йўқолади. Янги технология эса бу энергияни тахминан 5 наносекунд давомида сақлаб қолиш имконини беради. Бу стандарт кремний материалларига нисбатан 25 минг марта узоқроқ вақт деганидир.
Тизим асоси махсус кимёвий кўприк ёрдамида молекуляр катализатор билан боғланган кремний нанокристаллидан иборат. Айнан шу боғловчи элемент электронлар хулқ-атворини ўзгартириб, энергиянинг дарҳол тарқалиб кетишига йўл қўймайди ва уни фойдали кимёвий реакциялар учун сақлаб қолади.
Келажакда ушбу технология сувдан водород ишлаб чиқариш, карбонат ангидридни ёқилғига айлантириш ва атмосферадаги азотдан ўғитлар яратишда қўлланилиши мумкин. Агар мазкур ишланмани кенг миқёсда жорий этиш имкони туғилса, у янги авлод қуёш энергетикаси ва «яшил» кимё саноати учун асос бўлиб хизмат қилади.
“Zamin”ни Telegram'да ўқинг!
