NVIDIA RTX 6000 Blackwell нархи 11 минг долларгача ошди

NVIDIA компаниясининг профессионал даражадаги флагман тезлатгичи — NVIDIA RTX 6000 Blackwell нархи кескин кўтарилди. Агар сотувлар бошида ушбу қурилманинг тавсия этилган нархи 8 минг доллар атрофида бўлган бўлса, ҳозирда айрим чакана сотувчиларда унинг қиймати 10–11 минг долларгача етмоқда. Бу ҳақда Ixbt.com хабар беради.

Нархларнинг бундай ўсиши сунъий интеллект соҳасидаги жадал ривожланиш ва йирик AI-моделларни ўқитиш ҳамда ишга тушириш учун кучли GPU'ларга бўлган юқори талаб билан изоҳланмоқда. Айни пайтда бозорда таклиф чекланган: NVIDIA расмий сайтида карта ҳозирча мавжуд эмас, чакана савдо тармоқларида эса тезда тақчиллик юзага келган.

RTX 6000 Blackwell компаниянинг энг қудратли профессионал GPU'си ҳисобланади. Қурилма 96 GB ҳажмдаги GDDR7 хотираси билан жиҳозланган бўлиб, бу кўрсаткич оддий фойдаланувчиларга мўлжалланган GeForce RTX 5090 моделидан уч баравар кўпдир.

Хотиранинг бундай катта ҳажми мураккаб нейрон тармоқлар, генератив сунъий интеллект, 3D-графика ва маълумотлар марказларидаги ҳисоблаш жараёнлари учун жуда муҳим аҳамиятга эга.

Abror Shuhratov

«ZAMIN.UZ» муҳаррири

+ Zamin.uz сайтини Googleга қўшинг