АҚШдаги энг йирик давлат соғлиқни сақлаш тизими бўлган НЙК Ҳеалтҳ анд Ҳоспиталс (НЙЧҲК) киберҳужум оқибатида камида 1,8 миллион беморнинг шахсий ва тиббий маълумотлари, шунингдек, бармоқ излари ўғирланганини маълум қилди. Хакерлар тизимга учинчи томон провайдери орқали кириб, 2025-йил ноябридан 2026-йил февралигача бўлган даврда маълумотларни нусхалаб олган. Бу ҳақда Techcrunch.com хабар беради.
Ўғирланган маълумотлар орасида беморларнинг тиббий суғурта полислари, ташхислар, қабул қилинган дорилар, тўлов маълумотлари, ижтимоий суғурта рақамлари, паспорт ва ҳайдовчилик гувоҳномалари мавжуд. Шунингдек, ҳужжатлар юкланган вақтда қайд этилган аниқ геолокация маълумотлари ҳам хакерлар қўлига тушган бўлиши мумкин.
Вазиятнинг энг хавотирли жиҳати шундаки, хакерлар беморлар ва ходимларнинг биометрик маълумотларини, хусусан, бармоқ ва кафт изларини қўлга киритган. Биометрик маълумотлар ўзгармас бўлгани учун уларнинг ошкор бўлиши жабрланувчилар учун узоқ муддатли хавфсизлик хатарларини келтириб чиқаради.
НЙЧҲК вакиллари киберҳужум аниқлангач, тармоқ хавфсизлиги таъминланганини билдирди. Ҳозирча ташкилот хакерлар билан боғлиқ талаблар ёки ҳужумнинг кеч аниқланиш сабаблари бўйича изоҳ бермади. Мутахассислар ушбу ҳодисани жорий йилдаги энг йирик тиббий маълумотлар сизиб чиқиши ҳолатларидан бири деб баҳоламоқда.
“Zamin”ни Telegram'да ўқинг!
