Панасоник Кйкле Теч компанияси Японияда ўзининг янгиланган Хеалт Л3 2026 электр велосипедини расман тақдим этди. Мазкур модел ёрдамчи электр узатмали тизим билан жиҳозланган бўлиб, у шаҳар шароитида ҳаракатланиш учун мўлжалланган. Янги модел июн ойидан бошлаб тахминан 1600 доллар атрофида сотувга чиқиши кутилмоқда. Бу ҳақда Ixbt.com хабар беради.
Янги авлодда техник жиҳатдан бир қанча муҳим ўзгаришлар амалга оширилган. Хусусан, велосипеднинг олд ва орқа қисмларига янги ўқлар ўрнатилгани унинг мустаҳкамлигини ошириб, бошқарувни янада аниқроқ қилган. Энг асосий янгиликлардан бири — механик тормозлар ўрнига замонавий гидравлик дискли тормоз тизимининг жорий этилганидир.
Хеалт Л3 2026 модели 12,0 А·соат сиғимли литий-ионли аккумулятор билан таъминланган. Батарея тўлиқ қувватланиши учун тахминан 4 соат вақт талаб этилади ва тежамкор режимда 90 км масофани босиб ўтиш имконини беради. Шунингдек, Панасоник муҳандислари шаҳар кўчалари учун махсус мослаштирилган янги шиналарни ҳам ўрнатишган.
Велосипеднинг оғирлиги тахминан 21 кг ни ташкил этади ва у икки хил ўлчамдаги (390 ва 440 мм) рама билан таклиф этилади. 8 поғонали трансмиссияга эга бўлган ушбу транспорт воситаси тўрт хил рангда ишлаб чиқарилади. Ҳозирча янгилик фақат Япония бозори учун эълон қилинган бўлса-да, у халқаро экспертлар эътиборини тортишга улгурди.
“Zamin”ни Telegram'да ўқинг!
