Бойқўнғирда Союз МС-29 кемасининг асосий тизимлари синовдан ўтказилди

Бойқўнғир космодромида Союз МС-29 бошқариладиган космик кемасини парвозга тайёрлаш жараёни бошланди. Тайёргарликнинг дастлабки босқичларидан бири сифатида кема махсус акс-садосиз камерада синовдан ўтказилди. Бу ҳақда Ixbt.com хабар беради.

Ушбу синовлар давомида борт ускуналарининг ташқи радиохалақитларсиз ишлаши текширилди. Хусусан, кеманинг яқинлашиш ва туташиш тизими муваффақиятли назоратдан ўтди. Бу тизим каманинг коинотда хавфсиз ҳаракатланиши учун ўта муҳим ҳисобланади.

Акс-садосиз камера қурилмаларнинг электромагнит мослашувчанлигини ташқи сигналлардан тўлиқ ҳимояланган муҳитда баҳолаш имконини беради. Бу эса парвоз пайтида барча тизимларнинг ишончли ишлашини кафолатлаш учун зарурдир.

Яқин вақт ичида Союз МС-29 кемаси герметикликни текшириш учун вакуум камерасига юборилади. Бу парвоз олдидан амалга ошириладиган навбатдаги муҳим техник босқич бўлиб, космонавтларнинг хавфсизлигини таъминлашга хизмат қилади.

Abror Shuhratov

«ZAMIN.UZ» муҳаррири

+ Zamin.uz сайтини Googleга қўшинг