Volvo Карс компанияси Трумп маъмурияти билан келишувга эришди. Унга кўра, автоишлаб чиқарувчи Хитойнинг “ақлли” автомобил технологияларига қарши жорий этилган чекловлардан мустасно қилинди. Асосий акциялари Хитойнинг Geely Ҳолдинг компаниясига тегишли бўлган Швеция бренди АҚШ Савдо вазирлигидан тегишли рухсатномани олганини маълум қилди. Бу ҳақда Techcrunch.com хабар беради.
Мазкур рухсатнома Volvo компаниясига Хитой дастурий таъминоти ва технологиялари билан жиҳозланган автомобилларни АҚШга импорт қилиш ва сотишни давом эттириш имконини беради. Коннектед кар технологиялари смартфонлар билан синхронизация қилишдан тортиб, автоном бошқарув функцияларигача бўлган дастурий таъминотни ўз ичига олади.
Эслатиб ўтамиз, 2025-йил январ ойида Биден маъмурияти миллий хавфсизлик нуқтаи назаридан Хитойда ишлаб чиқилган дастурий ва аппарат таъминотига эга автомобилларни тақиқлаш ҳақида қарор қабул қилган эди. Volvo автомобиллари асосан Швецияда ишлаб чиқарилса-да, компаниянинг Geely билан алоқалари ва Хитойдаги заводлари сабабли ушбу чекловларга тушиб қолган эди.
Volvo вакилларининг сўзларига кўра, ушбу келишув Савдо вазирлиги билан бошқарув, технология ва маълумотлар хавфсизлиги бўйича ўтказилган конструктив музокаралар натижасидир. Эндиликда компания АҚШдаги кенгайиш режаларини, жумладан, Жанубий Каролинадаги заводида ХК60 ва янги гибрид моделларни ишлаб чиқаришни давом эттиради.
Шунингдек, янги қоидаларга кўра, Хитой компанияларига АҚШда ҳайдовчисиз автомобилларни синовдан ўтказиш тақиқланиши кутилмоқда. Ҳозирда Баиду, Pony.ai ва ВеРиде каби компаниялар Калифорнияда бундай синовларни ўтказиш рухсатномасига эга, бироқ ушбу лицензияларнинг бекор қилиниши масаласи кўриб чиқилмоқда.
“Zamin”ни Telegram'да ўқинг!
