Байқўнғирдан навбатдаги парвоз: Россия ва АҚШ экипажи 14-июльда учади

Роскосмос раҳбари Дмитрий Баканов Халқаро космик станцияга (ХКС) навбатдаги бошқариладиган парвоз 14-июльга режалаштирилганини маълум қилди. Парвоз Байқўнғир космодромидан амалга оширилади ва Россия ҳамда АҚШ иштирокидаги навбатдаги давлатлараро миссияга айланади. Бу ҳақда Ixbt.com хабар беради.

ХКС-75 миссиясининг асосий экипажи таркибидан россиялик космонавтлар Пётр Дубров ва Анна Кикина, шунингдек, NASA астронавти Анил Менон жой олган. Ушбу жамоа станциядаги илмий тадқиқотлар ва техник хизмат кўрсатиш ишларини давом эттириши кутилмоқда.

Захира экипажи таркибига эса космонавтлар Дмитрий Петелин ва Константин Борисов билан бирга NASA астронавти Дениз Бернхем киритилган. Улар асосий экипаж аъзоларида кутилмаган ҳолатлар юзага келган тақдирда парвозга тайёр туришади.

Мазкур миссия Халқаро космик станциядаги экипажларни ротация қилиш бўйича мунтазам дастурнинг бир қисми ҳисобланади. Бу каби ҳамкорликдаги парвозлар станциянинг барқарор ишлашини таъминлаш ва коинотни ўрганишда халқаро алоқаларни мустаҳкамлашга хизмат қилади.

Abror Shuhratov

«ZAMIN.UZ» муҳаррири

+ Zamin.uz сайтини Googleга қўшинг