Россиянинг етакчи ракета-космик корпорацияси — РКК Энергия бошқариладиган космонавтикани ривожлантиришнинг асосий стратегик вазифаларини белгилаб олди. Компаниянинг 2025-йилги ҳисоботига кўра, келажакда Марсга ва яқин астероидларга парвоз қилиш учун технологик захира яратиш энг муҳим йўналишлардан бири этиб тайинланган. Бу ҳақда Ixbt.com хабар беради.
Ҳужжатда қайд этилишича, 2025-йилда корпорация бошқариладиган космонавтика йўналишларини қайта кўриб чиқиш устида ишларни давом эттирган. Сайёралараро миссиялардан ташқари, Ойни ўзлаштириш ҳамда паст Ер орбитасидан космик фазонинг янада кенгроқ қисмларидан фойдаланишга ўтиш устувор вазифалар қаторидан жой олган.
Шунингдек, стратегик мақсад сифатида Россия орбитал станциясини (РОС) барпо этиш алоҳида кўрсатиб ўтилган. Бу лойиҳа келажакдаги узоқ коинот тадқиқотлари учун асосий база бўлиб хизмат қилиши кутилмоқда.
РКК Энергия — Россиянинг бошқариладиган космик кемаларини ишлаб чиқувчи асосий корпорация ҳисобланади. Сергей Королёв асос солган афсонавий ОКБ-1 вориси бўлган ушбу компания ўн йиллар давомида Союз ва Proгресс кемаларини, шунингдек, Салют ва Мир орбитал станцияларини яратиш билан шуғулланиб келган.
Бугунги кунда корпорация Халқаро космик станциянинг (ХКС) Россия сегменти ва бошқа кўплаб йирик космик лойиҳаларни бошқариб, соҳадаги етакчилигини сақлаб қолишга интилмоқда.
“Zamin”ни Telegram'да ўқинг!
