Россиянинг Boeing 737 ва Airбус А320 лайнерларига муқобил сифатида ишлаб чиқилган илк серияли MS-21-310 самолёти Иркутск авиация заводининг якуний йиғиш цехидан парвоз-синов бўлинмасига ўтказилди. Бу қадам ҳаво кемаси тизимларини текширишни тезлаштириш ва серияли машиналар учун кўзда тутилган синовлар мажмуасини муддатидан аввал бошлаш имконини беради. Бу ҳақда Ixbt.com хабар беради.
Иркутск авиация заводи бош директори Андрей Сойновнинг таъкидлашича, корхона импорт ўрнини босувчи MS-21-310 самолётларини ишлаб чиқариш суръатини тасдиқланган график асосида изчил ошириб бормоқда. Биринчи серияли самолётнинг синов майдонига ўтказилиши якуний йиғиш цехида навбатдаги машина учун жой бўшатишга хизмат қилади. Завод келажакда йилига 36 та самолёт ишлаб чиқариш даражасига чиқишни режалаштирган.
MS-21-310 — бу “Яковлев” ОАЖ томонидан ишлаб чиқилган янги авлод ўрта масофали йўловчи самолётидир. У эскирган Ту-154 ва Ту-204 моделларини, шунингдек, хорижий Boeing 737 ва Airбус А320 лайнерларини алмаштириш учун мўлжалланган. Лайнер 211 нафаргача йўловчини сиғдира олади ва 175 нафар йўловчи билан 3830 км масофага учиш имкониятига эга.
Ушбу ҳаво кемасининг асосий хусусияти унинг конструкциясида композит материалларнинг юқори улуши (тахминан 40%) эканлигидир. 310-версиянинг аввалги прототиплардан энг муҳим фарқи эса замонавий Россияда фуқаро авиацияси учун яратилган илк ПД-14 маҳаллий двигателлари билан жиҳозланганидир.
“Zamin”ни Telegram'да ўқинг!
