Қон босими баландлигининг яширин аломатлари: бунга бефарқ бўлманг!

Юқори қон босими (гипертония) — дунёда энг кўп тарқалган, шу билан бирга, энг яширин ҳолда кечадиган касалликлардан бири ҳисобланади. Кўпчилик одамлар унинг жиддий белгиларини ҳис қилмайди ва бу сабабли уни ўз вақтида аниқлаш ва олдини олиш мумкин бўлмай қолади.

Шифокорларнинг фикрича, қон босими 140/90 мм симоб устунидан юқори кўтарилса, бу аллақачон классик гипертонияга киради. Бироқ кўп ҳолларда ҳатто 130/80 мм ва ундан юқори кўрсаткичлар ҳам организм учун жиддий сигнал бўлиши мумкин.

Хўш, бу хасталикнинг яширин ва кўпчилик билмайдиган аломатлари қандай?

Қуйидагиларга диққат қилинг:

• Оёқ-қўлларнинг шиши, айниқса эрталаб тургандан кейин;
  
• Кўз остининг қорайиши ва шишиб қолиши;
  
• Ҳаддан ташқари чарчоқ, тез толиқиш, руҳий тушкунлик ҳолатлари;
  
• Терлашнинг ортиши, ҳатто ҳаддан ташқари совуқ ҳавода ҳам;
  
• Қулоқларда доимий шовқин, оғирлик ёки босим ҳисси.
  

Агар юқоридаги белгиларнинг ҳеч бўлмаганда бир нечтасини сезсангиз, қон босимингизни мунтазам назорат қилиб боришингиз зарур.

Қон босимини қандай қилиб тўғри ўлчаш мумкин?

Шифокорлар қуйидаги тавсияларга риоя қилишни маслаҳат беради:

• Қон босимини ўлчашдан аввал хотиржам бўлинг, стрессдан сақланинг ва қулай ҳолатда ўтиринг.
  
• Ўлчаш учун доимий равишда бир хил қўлни танланг, бу кўрсаткичларнинг аниқ ва ишончли чиқишига ёрдам беради.
  
• Агар сизда олдиндан юқори босим билан боғлиқ касалликлар мавжуд бўлса ёки мунтазам равишда дори воситаларини қабул қилсангиз, кунига икки марта бир хил қўлда қон босимини ўлчаш тавсия этилади.
  

Қон босими ўнг ёки чап қўлда ўлчаниши керакми?

Мутахассислар бу масалада махсус синов ўтказишни тавсия этади. Аввал ҳар икки қўлда 2 дақиқалик интервал билан қон босимини ўлчанг ва натижаларни таққосланг. Кейинчалик, қайси қўлда кўрсаткич юқори бўлса, мунтазам равишда шу қўлда ўлчашни давом эттиринг.

Бироқ икки қўл орасида сезиларли фарқ кузатилса (диастолик босимда 5 мм симоб устуни ва ундан кўп, систолик босимда эса 10 мм ва ундан кўп), бу томирларда атеросклероз ёки бошқа жиддий касалликларнинг белгиси бўлиши мумкин. Шу сабабдан, тезлик билан шифокор кўригидан ўтиш ва зарур таҳлилларни топшириш тавсия этилади.

Zamin.uz таҳририяти соғлигингизга жиддий эътибор беришингизни тавсия қилади. Ахир, ўз вақтида кўрилган чоралар катта муаммоларнинг олдини олади.

Юқоридаги белгилар сизда учрайдими? Унда кечикмасдан тиббий кўрикдан ўтинг! «Замин»ни Telegram’да ўқинг!