Узум — қадимдан инсон парҳезининг ажралмас қисми бўлиб келган ширин ва фойдали мева. У нафақат мазаси, балки таркибидаги қимматли моддалар билан ҳам қадрланади.
Таркибида А, C, К витаминлари, калий, магний, темир ва кўплаб антиоксидантлар мавжуд. Улар иммунитетни мустаҳкамлайди, ҳужайраларни эркин радикаллардан ҳимоя қилади ва қариш жараёнини секинлаштиради.
Узум юрак-қон томир саломатлигига фойдали бўлиб, қон айланишини яхшилайди ва қон босимини меъёрда ушлаб туришга ёрдам беради. Ундаги калий ва флавоноидлар юрак фаолиятини қўллаб-қувватлайди.
Мева овқат ҳазм қилиш тизимини мустаҳкамлайди. Таркибидаги толалар ичак фаолиятини нормаллаштиради, қабзиятнинг олдини олади ва ошқозон-ичак касалликларига қарши самарали таъсир кўрсатади.
Узум суви ва янги доналари буйрак ва жигар фаолиятини яхшилайди, организмдан токсинларни чиқаради. Табиий диуретик сифатида ортиқча суюқликни ҳам чиқаради.
Ширинлиги юқори бўлса-да, ундаги табиий фруктоза тез ҳазм бўлади ва тезкор энергия манбаи ҳисобланади. Спортчилар учун у аъло табиий “энергия заряди”дир.
Шифокорлар узумни янги ёки қуритилган ҳолда истеъмол қилишни тавсия этади. Ҳар иккала ҳолатда ҳам у организм учун фойдали моддалар манбаи бўлиб қолади.
«Замин»ни Telegram’да ўқинг!
