Индонезиянинг Сраген шаҳрида 365 киши бепул мактаб тушлигидан кейин заҳарланиш аломатлари билан касал бўлди. Маҳаллий ҳокимият овқат намуналарини текшириш учун дастур фаолиятини вақтинча тўхтатди.
Президент Прабово Субианто ташаббуси бўлган бепул овқат дастури мамлакатдаги болаларда ўсиш сустлигини камайтириш учун жорий этилган. 28 миллиард долларлик лойиҳа мамлакат бўйлаб 80 миллион ўқувчини овқат билан таъминлайди. Аммо бу каби заҳарланиш ҳолатлари дастур хавфсизлигига бўлган ишончни камайтирмоқда.
Заҳарли таом таркибида сариқ гуруч, қовурилган тухум, бодринг салати ва сут бўлган. Улар марказий ошхонада тайёрланиб, бир нечта мактабларга тарқатилган. Ҳукумат тиббий харажатларни тўлиқ қоплашини билдирди.
Расмийлар дастур бўйича қатъийроқ гигиена талабларини жорий қилиш кераклигини таъкидлашмоқда. Шу пайтгача дастур ишга тушганидан бери мамлакат бўйлаб мингдан ортиқ одам заҳарланиш аломатлари билан шифохонага мурожаат қилган.
Бепул овқат дастури молиявий босимга ҳам сабаб бўлди. Уни молиялаштириш учун бир нечта вазирликларнинг бюджети кесилди. Шу сабабли айрим фуқаролар норозилик намойишларига чиқиб, ҳукуматдан дастур хавфсизлиги ва молиявий барқарорлигини таъминлашни талаб қилмоқда.
«Замин»ни Telegram’да ўқинг!
Ctrl
Enter
Хато топдИнгизми
Иборани ажратиб Ctrl+Enter тугмасини босинг
Мавзуга оид янгиликлар
