Мизофония — бу айрим одамларда муайян товушларга нисбатан ортиқча ҳассослик ва жуда кучли ҳиссий реакция уйғотадиган ҳолат сифатида таърифланади. Бундай ҳолатда оддий одам эътибор бермайдиган овозлар бемор учун қаттиқ безовта қилувчи таъсирга эга бўлиши мумкин. Масалан, чайнаш, қалам ғижирлаши ёки компьютер клавиатурасида тез ёзиш шовқини.
Мизофониянинг аниқ сабаблари ҳали тўлиқ аниқланмаган. Илмий изланишлар мияда товушни қайта ишлаш жараёнидаги асаб тизими фаолиятида ноодатийлик мавжуд бўлиши мумкинлигини кўрсатади. Мия айрим овозларни таҳдид сифатида қабул қилади ва организм стресс ҳолатига тушади — юрак уришининг тезлашиши, қўл терлаши ёки нафас олишнинг кучайиши кузатилиши мумкин.
Белгилари орасида товушга нисбатан кучли ғазаб, асабийлик, ундан қочиш ёки ҳатто изоляцияга мойиллик бўлади. Жамоат жойларида бундай ҳолат айниқса ноқулайлик туғдиради. Шу сабаб мизофония фақат физиологик эмас, балки психологик муаммо сифатида ҳам кўриб чиқилади.
Даволаш усуллари орасида когнитив терапия, овозга мослашув машқлари, стрессни бошқариш ва айрим ҳолларда махсус эшитиш қурилмаларидан фойдаланиш тавсия этилади. Яқинлари томонидан тушуниш ва қўллаб-қувватлаш энг муҳим ёрдам ҳисобланади.
«Замин»ни Telegram’да ўқинг!
