Саримсоқ пиёз инсоният томонидан минг йиллар давомида шифобахш маҳсулот сифатида қадрлаб келинади. У нафақат таомларга ўзига хос мазали таъм бағишлайди, балки саломатлик учун беқиёс фойдаси билан ҳам машҳур. Замонавий тиббий тадқиқотлар ҳам унинг кўпгина касалликларга қарши самарали таъсир кўрсатишини тасдиқламоқда.
Биринчи навбатда, саримсоқ иммун тизимини мустаҳкамлайди. Унинг таркибидаги антиоксидантлар ва фитонцидлар организмни турли вируслар ҳамда бактериялардан ҳимоя қилади. Айниқса, ундаги асосий модда — аллицин ўткир инфекцияларга қарши курашиб, зарарли микроорганизмларни йўқотиш қобилиятига эга. Шунинг учун саримсоқ шамоллаш ва вирусли касалликлар мавсумида табиий ҳимоя воситаси сифатида қўлланилади.
Саримсоқнинг яна бир муҳим хоссаси — юрак ва қон томир саломатлигига ижобий таъсири. У мунтазам истеъмол қилинганда қон босимини пасайтиради, "ёмон" холестеринни камайтиради ва юрак хуружи ҳамда инсульт хавфини камайтиради. Таркибидаги олтингугуртли бирикмалар қоннинг суюқланишига ёрдам беради, қон айланишини яхшилайди ва томирлар фаолиятини барқарорлаштиради.
Саримсоқ табиий яллиғланишга қарши восита сифатида ҳам машҳур. Унинг моддалари организмда яллиғланишни кучайтирувчи ферментларни блоклайди. Шу сабабли, у артрит, астма ва турли сурункали касалликлар даволашда ёрдамчи сифатида қўлланиши мумкин. Тиббий амалиётда саримсоқ яллиғланишни камайтирувчи табиий восита сифатида тавсия этилади.
«Замин»ни Telegram’да ўқинг!
