Кўз қичишиши турли сабабларга кўра юзага келади ва унинг давоси ҳам манбага боғлиқ бўлади. Айрим ҳолатларда уй шароитида муаммони енгиш мумкин, баъзиларида эса мутахассисга мурожаат қилиш талаб этилади.
Мутахассислар таъкидлашича, аллергия сабабли қичишишда аллергенлардан узоқ туриш ва антигистамин дори воситаларини қабул қилиш фойда беради. Шунингдек, кўз гигиенасига амал қилиш, қўлни ювмасдан кўзга тегмаслик ва сунъий кўз ёши томчиларидан фойдаланиш тавсия этилади.
Кўзни чарчашдан асраш учун компьютер экранига узоқ тикилмаслик, ҳар 20 дақиқада кўзни дам олдириш муҳим. Тўғри овқатланиш, хусусан А витамини ва омега-3 моддаларига бой маҳсулотлар истеъмол қилиш ҳам кўз саломатлигини яхшилайди.
Шунингдек, хонада ҳавони нам сақлаш, шамол ва чангдан ҳимояланиш қичишишнинг олдини олади. Агар муаммо узоқ давом этса ёки кўриш қобилияти пасайса, албатта офтальмолог маслаҳати зарур.
«Замин»ни Telegram’да ўқинг!
