Кўпчилик кундалик ҳаётда вақт танқислиги сабаб шошилиб овқатланишга одатланиб қолган. Бироқ мутахассислар бу одат организм учун зарарли бўлиши мумкинлигини таъкидламоқда. Овқатни жуда тез ейиш ҳазм жараёнини қийинлаштириб, ошқозонга ортиқча юклама беради.
Шунингдек, инсон шошиб овқатланганда таомни етарлича чайнамайди. Бу эса қорин дам бўлиши, оғирлик ҳисси ва ҳазм билан боғлиқ муаммоларга олиб келиши мумкин. Мутахассислар фикрича, мия тўйганлик сигналини тахминан 20 дақиқада қабул қилади. Тез овқатланиш эса инсоннинг меъёрдан ортиқ овқат ейишига сабаб бўлади.
Шифокорлар секин ва хотиржам овқатланишни тавсия этади. Овқатни яхшилаб чайнаш нафақат ҳазмни енгиллаштиради, балки организмга озуқа моддаларини яхшироқ ўзлаштиришга ҳам ёрдам беради. Шунинг учун овқатланиш вақтида шошмаслик ва диққатни таомга қаратиш муҳим ҳисобланади.
“Zamin”ни Telegram'да ўқинг!
