Qo‘shni Qirg‘izistonda avtomobilsozlik sohasida yirik qadam tashlanmoqda. Ma’lumotlarga ko‘ra, mamlakatda Lada avtomobillarini yig‘ishga ixtisoslashgan zamonaviy zavod ishga tushiriladi. Bu haqda «Vedomosti» nashri xabar tarqatdi.
Loyiha Rossiyaning mashhur avtokonserni AvtoVAZ hamda Central Asia Capital jamg‘armasi hamkorligida amalga oshiriladi. Ikki tomon tomonidan taqdim etilgan dastlabki rejalarga ko‘ra, investitsiya hajmi qariyb 30 million dollarni tashkil etadi. Bu esa Qirg‘iziston iqtisodiyotidagi eng yirik sanoat tashabbuslaridan biri sifatida qayd etilmoqda.
Ta’kidlanishicha, loyiha 10 yil davomida bosqichma-bosqich amalga oshiriladi. Uning dastlabki bosqichi 2026 yildan 2030 yilgacha bo‘lgan davrni o‘z ichiga oladi. Bu paytda zavodda yillik hajmi 1,5 mingtagacha avtomobilni yirik uzelli yig‘ish jarayoni yo‘lga qo‘yiladi.
Ikkinchi bosqich esa 2031 yildan 2035 yilgacha amalga oshiriladi. Bu vaqtda zavodda ishlab chiqarish hajmi kengayib, turli modellar assortimenti ko‘payadi. Shu tariqa, korxona yiliga 5 mingtagacha avtomobil ishlab chiqarish imkoniyatiga ega bo‘ladi.
Loyihaning uchinchi bosqichi eng muhim bosqich hisoblanadi. Chunki 2035 yildan keyin zavod to‘liq ishlab chiqarish sikliga o‘tadi. Shu bilan birga, korxona yiliga 7 mingtagacha tayyor avtomobil ishlab chiqarish salohiyatiga erishadi.
Mutahassislar ta’kidlashicha, mazkur tashabbus nafaqat Qirg‘iziston sanoatidagi yangi sahifani ochadi, balki butun mintaqada avtomobilsozlik sohasi rivojiga katta turtki berishi mumkin. Zero, Lada brendi ko‘p yillardan beri Markaziy Osiyo bozorida yuqori talabga ega.
Shu bois, Qirg‘izistondagi ushbu yirik zavod faoliyati mamlakat iqtisodiyoti va ish o‘rinlarini yaratishda ham muhim ahamiyat kasb etishi kutilmoqda.
“Zamin”ni Telegramʻda oʻqing!
