Ferrari kompaniyasi o'zining eng imtiyozli mijozlari uchun mo'ljallangan navbatdagi maxsus loyihasi — Ferrari HC25 modelini taqdim etdi. Flavio Manzoni boshchiligidagi dizaynerlar jamoasi tomonidan yaratilgan ushbu avtomobil Ferrari F8 Spider bazasida qurilgan bo'lib, brendning o'rta dvigatelli superkarlari kelajagidan darak beradi. Bu haqda Autocar.co.uk xabar beradi.
Yangi model Ferrari F8 (gibrid tizimsiz oxirgi V8 dvigatelli model) hamda zamonaviy Ferrari F80 va 12Cilindri flagmanlari o'rtasidagi bog'lovchi bo'g'in vazifasini o'taydi. Avtomobil tashqi ko'rinishida geometrik shakllar va yaltiroq qora rangdagi kontrast elementlar ustunlik qiladi. Yon qismidagi o'ziga xos chiziqlar dvigatel joylashuvini ta'kidlab, avtomobilga dinamik va shiddatli qiyofa bag'ishlaydi.
Texnik jihatdan HC25 yangi yoritish texnologiyalari bilan jihozlangan. Xususan, ingichka linzali faralar va Ferrari tarixida ilk bor qo'llanilgan «tishsimon» kunduzgi chiroqlar avtomobilning o'tkir dizaynini to'ldiradi. Intererda esa kulrang mato qoplamalar sariq rangli tikuvlar va grafik elementlar bilan uyg'unlashtirilgan.
Ushbu noyob superkar ilk bor AQShning Texas shtatidagi Circuit of the Americas trassasida bo'lib o'tadigan Ferrari Racing Days tadbirida keng jamoatchilikka namoyish etiladi.
“Zamin”ni Telegramʻda oʻqing!
